სამების საკათედრო ტაძარში საკვირაო წირვის დასასრულს პატრიარქის მოსაყდრემ მეუფე შიომ იქადაგა. მან ბათუმში დატრიალებულ ტრაგედიის დროს დაღუპულების ოჯახებსაც მისამძიმრა და ქრისტიანულ მოწყალებაზე ისაუბრა.

„ჩვენ კიდევ ერთხელ ვიხსენებთ, რაც მოხდა გუშინწინ ბათუმში. ვუსამძიმრებთ და ვლოცულობთ იმ ადამიანების სულების საცხონებლად და მათ ოჯახებს ვუსურვებთ გაძლიერებას და ღვთის შეწევნას“, - აღნიშნა მეუფე შიომ.

უფლისთვის მთავარია, ჩვენს გულში და სულში ჩავიხედოთ, რომ არ იყოს გულცივობა, გულქვაობა, - განაცხადა მეუფე შიომ მოწყალებასა და კეთილ სამარიტელზე ქადაგებისას.

„ჩვენ კი არ უნდა ვიფიქროთ ვინ არის ჩვენთვის მოყვასი, არამედ, ჩვენ უნდა ვიფიქროთ ჩვენ ვისთვის ვიყოთ მოყვასი, რომ ჩვენ ყველასთვის უნდა ვიყოთ მოყვასი, ვისაც ესაჭიროება გვერდში დგომა, ვინც ჩვენთან დგას, ჩვენს გვერდით, განურჩევლად ეროვნებისა, სარწმუნოებისა, ყველას მიმართ უნდა ვიყოთ მოყვასები.

უფლისთვის მთავარია ჩვენს გულში, ჩვენს სულში ჩავიხედთ, რომ არ იყოს გულცივობა, გულქვაობა, იყოს მოწყალება, სიყვარული, როგორც ჰქონდა ამ სამარიტელს, რამეთუ მოწყალება არის გზა. საუკუნო ცხოვრების ერთ-ერთი უმთავრესი საწინდარი არის სამარიტელისებური თვისება მოწყალებისა. ჩვენ, როგორც არასდროს, გვესაჭიროება ეს თვისება - მოწყალება. დალოცვილები და გახარებულები გამყოფოთ უფალმა“, - განაცხადა ქადაგებისას მეუფე შიომ.

წირვის შემდეგ ჟურნალისტების კითხვაზე, მეუფე შიომ განაცხადა, რომ მან არ იცის, რატომ დანიშნა პატრიარქმა მოსაყდრედ. მისი განცხადებით, ეს ილია მეორის გადაწყვეტილებაა და ის ამ გადაწყვეტილებას ემორჩილება. როგორც მეუფემ აღნიშნა, განმარტებას ამ საკითხზე თუკი საჭირო გახდება, თავად პატრიარქი გააკეთებს.

"ჩვენ ველოდებით მის უწმინდესობას. რომ ჩამოვა, ის თავად დააკონკრეტებს უფლებამოსილებებს. მას ამ გადაწყვეტილების მიღების სრული უფლება ჰქონდა, უბრალოდ ეს ჩვენთვის ყველასთვის მოულოდნელი იყო,"- განაცხადა მიტროპოლიტმა.

(ფოტო 1TV)