„მოსაყდრეს რატომ უნდა ვკითხო“ - მეუფე იაკობი პატრიარქის მოსაყდრის შესახებ

რელიგია - 22:53, 25 Nov, 2017

11819

რას ფიქრობს ქორეპისკოპოსი იაკობი პატრიარქის მიერ თავის მოსაყდრედ მეუფე შიოს დანიშვნაზე - ,,კურიერთან“ ინტერვიუში ის ამბობს, რომ პატრიარქი ასეთ სერიოზულ გადაწყვეტილებებზე თავად იღებს გადაწყვეტილებას. მეუფე იაკობი ამბობს, რომ თავად არასოდეს მოისურვებდა მოსაყდრეობას - „მოსაყდრე არავითარ შემთხვევაში არ ვიქნებოდი, უარს ვიტყოდი. პატრიარქმა იცის, მე რაც არ მსურს და იმას არ დამავალებს“.

ქორეპისკოპოსის თქმით, საპატრიარქოსთან დაკავშირებულ საკითხებზე მას აქვს კომუნიკაცია პრემიერთან, ეკონომიკისა და ფინანსთა სამინისტროებთან, ძალოვან უწყებებთან, თავდაცვის სამინისტროს გარდა.

ჟურნალისტის მიერ დასმულ შეკითხვაზე, მოსაყდრის დანიშვნის შემდეგ მას უნდა ჰკითხოს თუ არა, რა სახის კომუნიკაცია ექნება მთავრობასთან, მეუფე იაკობმა განაცხადა, რომ ის ამას მოსაყდრეს არ შეეკითხება.

„მოსაყდრეს რატომ უნდა ვკითხო. მოსაყდრე არის უპირატესი მღვდელმთავარი, წირვებზე დადგება წინ,“ - განაცხადა მეუფე იაკობმა, რომელიც ამბობს, რომ მისთვის უცნობი იყო პატრიარქის მიერ მოსაყდრის დასახელების შესახებ, თუმცა აღნიშნა, რომ მას ეს გაუხარდა.

„გამიხარდა, ცოტა ხანი გაჩერდება, რაც ამდენი კამპანია მიდის ჩემს წინააღმდეგ, თუ არ გაჩერდებიან, ნება მათია,“ - აღნიშნა მეუფე იაკობმა.

რაც შეეხება შორენა თეთრუაშვილის თემას, მეუფე იაკობის თქმით, მისი მისი ეშინიათ და დემონიზაცია მიმდინარეობს.