მეუფე შიოს პატრიარქის მოსაყდრედ დასახელებას მიესალმება ჭყონდიდელი მიტროპოლიტი მეუფე პეტრე და აცხადებს, რომ გიორგობას, უწმინდესის მიერ მიღებული ეს გადაწყვეტლება, ისტორიული მნიშვნელობისაა.

,,მიმაჩნია, რომ სინოდის წევრთა უმრავლესობისთვის ეს გადაწყვეტილება იყო მოულოდნელი. რა თქმა უნდა, პატივს ვცემ ამ გადაწყვეტილებას. შევთხოვ უფალს, რომ იყოს ღვთის ნება და წარმატებებს ვუსურვებ მოსაყდრე შიოს. ჩვენ პატივი უნდა ვცეთ უწმინდესის ამ გადაწყვეტილებას. ეს იქნება ლუსტრაცია სინოდისა და ეკლესიის წევრებისთვის. როგორც ერთი ფილოსოფოსი ამბობს, უშურველობა გენიოსების თვისებაა და გამოჩნდება ახლა რამდენი გენიოსია" - განაცხადა მეუფე პეტრემ.

მისივე განმარტებით, მეუფე შიოს უფლება აქვს მიიღის გადაწყვეტილებები, ორგანიზება გაუწიოს საბჭოებს, ერთპიროვნულად გადაწყვიტოს პატრიარქის დავალებები და ისარგებლოს უწმინდესის სრული ნდობით.

სავარაუდოდ, დღეს საპატრიარქო განცხადებას გამოაქვეყნებს ილია მეორის გადაწყვეტილებასთან დაკავშირებით, რომელიც პატრიარქის მოსაყდრედ მიტროპოლიტ შიო მუჯირის დანიშვნას ეხება. ამ განცხადებაში ასევე განიმარტება მოსაყდრის უფლება-მოვალეობები.