გაუპატიურება, მენსტრუალური ციკლის შეწყვეტა, ანტისანიტარია - ახალგაზრდა გოგონას ბედი ჩრდილო კორეის არმიაში

მსოფლიო - 18:22, 23 Nov, 2017

41639

ყოფილი ჩრდილოეთ კორეელი სამხედრო მოსამსახურე ქალი, ლი სო ენი, რომელმაც მსოფლიოს სიდიდით მეოთხე არმიაში 10 წელი გაატარა, იმ გაუსაძლის პირობებზე ჰყვება, რომელიც მან იქ გადაიტანა. ლი სო ენმა ქვეყნიდან გაქცევა მოახერხა და ახლა დასავლეთში ცხოვრობს.

ძალადობა, გაუპატიურება, მენსტრუალური ციკლის შეწყვეტა, ეს ის შედეგებია, რომელიც ჩრდილოეთ კორეის არმიაში მოსამსახურე ქალს ელის. ანტისანიტარია, ხშირი ცემა, კორეული არმიის "ბუნებრივი" პირობებია.

ლის 10 წლის განმავლობაში სხვა 20 ქალთან ერთად ერთ ოთახში ეძინა. მას საკუთარი პატარა ტუმბო ჰქონდა, სადაც სამხედრო ფორმას ინახავდა. ტუმბოზე აუცილებლად უნდა მდგარიყო კიმ ირ სენისა და კიმ ჩენ ირის სურათი.

"ჩვენ ძალიან ვოფლიანდებოდით. მატრასები, რომელზეც გვეძინა ბრინჯის ჩენჩოსგან იყო დანზადებული და ყველა სუნს ადვილად იწოვდა. ჩვენ ცხელ შხაპს ვერ ვიღებდით - ცხელი წყალი არ არსებობს ჩრდილოეთ კორეაში. კაზარმაში გამოყვანილი იყო მთის წყაროსთან მიერთებული მილი, საიდანაც ხანდახან ბაყაყებიც ცვიოდა," - აცხადებს იგი.

41 წლის სო ენი უნივერსიტეტის ლექტორის შვილია. მისი ოჯახის უმრავლესობა - სამხედროა. 90-იან წლებში როდესაც ჩრდილოეთ კორეაში შიმშილობა იყო, სხვა ატასობით გოგონასთან ერთად, იგი ჯარში საკუთარი სურვილით წავიდა.

აღსანიშნავია, რომ 2015 წლიდან, 18 წლის გოგონების ჯარში გაწვევა უკვე სავალდებულო გახდა - სავალდებულო სამსახურის ვადა 7 წელია.

17 წლის გოგონა თავიდან პატრიოტული გრძნობებით იყო ანთებული და სამხედრო სამსახურით აღფრთოვანებული იყო. მამაკაცი და ქალი ჯარისკაცის სამსახურისა და ცხოვრების პირობები თითქმის ერთნაირი იყო - ქალებს ნაკლები ფიზიკური დატვირთვა ჰქონდათ, თუმცა ისინი სანაცვლოდ ვალდებული იყვნენ კაზარმების დალაგების, რეცხვისა და საჭმლის მომზადებაში მიეღოთ მონაწილეობა, რასაც მამაკაცები არ აკეთებდნენ.

"გადაჭარბებული ფიზიკური დატვირთვა და არასაკმარისი კვება თანდათანობით გავლენას ახდენდა გოგონებზე. 1-1,5 წლის შემდეგ მათ მენსტრუალური ციკლი უწყდებოდათ, რითიც ისინი პირიქით, გახარებული იყვნენ, რადგან დამატებითი პრობლემისგან თავისუფლდებოდნენ. იყო შემთხვევები, როდესაც 20 წლის გოგონას უკვე მენსტრუაცია გამქრალი ჰქონდა," - აცხადებს სო ენი.

სამხედრო მოსამსახურე ქალები აცხადებენ, რომ ჩრდილოეთ კორეის არმიაში სექსუალური შევიწროება და ძალადობა ჩვეულებრივი მოვლენაა, თუმცა, სიმორცხვის გამო, ისინი ამბობენ, რომ თავად მათ ეს არ შეხებია. იგივეს ყვება ლი სო ენიც:

"ქვედანაყოფის მეთაურის ბრძანებით, სამხედრო მოსამსახურე გოგონას მის კაბინეტში იძახებდნენ, სადაც მას აუპატიურებდნენ. ყოველი მათგანი ამას რამდენჯერმე აკეთებდა, ხოლო შემდეგ "ობიექტი" იცვლებოდა".

ამ ფაქტს ქვეყნის ხელისუფლებაც აღიარებს. გამოიცა კანონი, რომელიც აღნიშნულ დანაშაულში მხილებულს 7 წლით თავისუფლების აღკვეთა ელის. თუმცა უმეტეს შემთხვევაში ეს ასე არ ხდება - გოგონებს ეშინიათ მეთაურის წინააღმდეგ ჩვენების მიცემა.

ლი სო ენმა არმიაში 11 წელი გაატარა. იგი, სამხრეთ კორეის საზღვართან ახლოს. კავშირგაბმულობის ქვედანაყოფში მსახურობდა. სამსახურის შემდეგ, 29 წლის ასაკში. იგი ოჯახს დაუბრუნდა, მაგრამ თავს გაუცხოეულად გრძნობდა და საბოლოოდ, 2008 წელს სამხრეთ კორეაში გაიქცა

"ბევრი გამოქცეული, სხვადასხვა გადაჭარბებულ ზღაპარს ყვება ჩემს სამშობლოზე, ისინი ხშირად გარკვეულ თანხასაც იღებენ ამაში. რაც მე მოგიყევით - სიმართლეა, მე ამ ინტერვიუში ფული არ ამიღია," - აცხადებს ყოფილი ჯარისკაცი ქალი.

წყარო - BBC