დაკავებულია ერთი და ლიკვიდირებულია 3 პირი- სუს-ის საგანგებო ბრიფინგი სპეცოპერაციაზე

პოზიცია - 19:06, 22 Nov, 2017

3793

თბილისში, გაბრიელ სალოსის ქუჩაზე ჩატარებულ მასშტაბურ სპეცოპერაციასთან დაკავშირებით სახელმწიფო უსაფრთხოების სამსახურში საგანგებო ბრიფინგი გაიმართა,როგორც სუს-ის ბრიფინგზე გახდა ცნობილი სპეცოპერაციის შედეგად დაკავებულია დანაშაულებრივი დაჯგუფების 1 წევრი, ხოლო 3 ლიკვიდირებულია.

სპეცოპერაციისას დაიღუპა სახელმწიფო უსაფრთხოების სამსახურის 1 სპეცრაზმელი და დაიჭრა 2. ამასთანავე დაჭრილია შსს-ს განსაკუთრებულ დავალებათა დეპარტანენტის 2 წევრი.

,,სახელმწიფო უსაფრთხოების სამსახურის კონტრტერორისტული ცენტრის მიერ თბილისში, ბერი გაბრიელ სალოსის გამზირზე ჩატარებული სპეცოპერაცია დასრულებულია. ჩატარებული ღონისძიების შედეგად, დაკავებულია დანაშაულებრივი ჯგუფის ერთი წევრი ,ხოლო სამი ლიკვიდირებულია.

სამწუხაროდ, სპეცოპერაციის დროს დაიღუპა სახელმწიფო უსაფრთხოების სამსახურის 1 თანამშრომელი და დაიჭრა 2 . ამასთანავე, დაჭრილია შსს-ს განსაკუთრებულ დავალებათა დეპარტამენტის ორი თანამშრომელი.

სახელმწიფო უსაფრთხოების სამსახური სამძიმარს უცხადებს დაღუპულის ოჯახს.

არსებული ინფორმაციით, დანაშაულებრივი დაჯგუფების წევრები არ იყვნენ საქართველოს მოქალაქეები. ამ პირებთან მიმართებაში დაკვირვება უკანასკნელი რამდენიმე კვირის განმავლობაში ხორციელდებოდა. საერთაშორისო ანტიტერორისტული თანამშრომლობის ფარგლებში, აღნიშნული ჯგუფის წევრების სრული იდენტიფიკაციის მიზნით, მიმდინარეობს შესაბამისი ღონისძიებები დანაშაულებრივი კავშირების დადგენის მიზნით.

სახელმწიფო უსაფრთხოების სამსახურის სახელით გვსურს მადლობა გადავუხადოთ ყველა იმ თანამშრომელს, სპეცრაზმელს და პოლიციელს, ვინც საკუთრი სიცოცხლის რისკის ფასად დაიცვა ჩვენი მოქალაქეები.

ამ რთული ვითარების გადატანისთვის მადლობას ვუხდით ჩვენს მოსახლეობას რომ მათ ითანამშრომლეს სამართალდამცველებთან“ - ნათქვამია სუს-ის განცხადებაში.

ბერი გაბრიელ სალოსის გამზირზე სპეცოპერაცია გუშინ, 20:00-სთვის დაიწყო და დაახლოებით 22:00 სათის განმავლობაში მიმდინარეობდა.

ადგილზე სროლები და აფეთქებების ხმა მთელი ამ პერიოდის განმავლობაში ისმოდა.

სპეცოპერაცია 22 ნოემბერს 17:30 საათზე დასრულდა.