ტარანტინო ახალი ფილმისთვის ვარსკვლავურ შემადგენლობას კრებს

ეს საინტერესოა - 17:55, 18 Nov, 2017

2012

კვენტინ ტარანტინო თავისი ახალი ფილმისთვის განსაკუთრებულად ვარსკვლავური გუნდის შეკვრას გეგმავს. გავრცელებული ინფორმაციით ფილმში, რომელიც 1969-1970 წლებში მომხდარ კრიმინალურ ისტორიებზე იქნება, სავარაუდოდ ტომ კრუზი, ბრედ პიტი, ლეონარდო დიკაპრიო და სამუელ ლ. ჯექსონი და მარგო რობი მიიღებენ მონაწილეობას. ფილმში ასახულ რამდენიმე კრიმინალურ ისტორიას შორის ერთ-ერთი 1969 წლის 8 აგვისტოს ჩარლზ მენსონის დაჯგუფების მიერ ჩადენილი მკვლელობებია, რომელსაც 5 ადამიანი, მათ შორის რეჟისორ რომან პოლანსკის ცხრა თვის ორსული ცოლი - მსახიობი შერონ ტეიტი ემსხვერპლა. არაოფიციალური ინფორმაციით მარგო რობი სწორედ მის როლს შეასრულებს, ბრედ პიტმა შესაძლოა გამომძიებელი დეტექტივის როლი შეასრულოს, დიკაპრიომ კი შესაძლოა თავად ჩარლზ მენსონი განასახიეროს. რა როლი ექნებათ ტომ კრუზსა და სამუელ ლ. ჯექსონს, ამ ეტაპზე უცნობია.

ფინანსურ მხარდაჭერას ტარანტინოს ისეთი წამყვანი სტუდიები სთავაზობენ, როგორებიცაა: Lionsgate, Fox, Sony Pictures, Universal Pictures, Annapurna Pictures და სხვა. ფილმის წარმოებას 100 მილიონი აშშ დოლარი სჭირდება.

კვენტინ ტარანტინო თავის რიგით მე-9 ფილმის გადაღებებს მომავალი წლის ზაფხულში, კალიფორნიაში დაიწყებს, პრემიერა კი 2019 წელს გაიმართება.