რუსეთმა სირიაში ქიმიური თავდასხმის გამოძიებას ისევ ვეტო დაადო , რასაც თეთრი სახლის მწვავე რეაქცია მოჰყვა

მსოფლიო - 13:48, 18 Nov, 2017

1343

სირიაში, 2017 წლის აპრილში განხორციელებული ქიმიური თავდასხმის ფაქტის საერთაშორისო გამოძიების მხარდამჭერ რეზოლუციაზე რუსეთის მიერ ვეტოს დადებას მწვავე შეფასებები მოჰყვა თეთრი სახლის მხრიდან. აშშ-ს ხელისუფლებამ რუსეთი ქიმიური მოწამვლის მსხვერპლთა უპატივცემულობაში დაადანაშაულა.

„გამოძიების მანდატის გაგრძელებაზე ვეტოს დადებით რუსეთმა მკაფიო სიგნალი გააგზავბა, რომ ის არ აფასებს ქიმიური თავდასხმის მსხვერპლთა სიცოცხლეს ან პატივს არ სცემს ქიმიური იარაღის გამოყენებასთან დაკავშირებით საერთაშორისოდ მიღებულ სტანდარტებს.“- ნათქვამია თეთრი სახლის განცხადებაში.

განცხადებაში ასევე აღნიშნულია რომ რუსეთის ეს ქმედება ნაკარნახევია ასადის რეჟიმის და იმ ტერორისტების დაცვით, რომლებიც სირიაში ქიმიურ იარაღს იყენებენ.

ვაშინგტონის განცხადებით, რუსეთის უარის მიუხედავად ისინი მაინც მოახერხებენ რომ გამოძიება ბოლომდე მივიდეს .

შეგახსენებთ სირიაში ქიმიური იარაღის გამოყენების ფაქტის გამოძიებასთან დაკავშირებით რეზოლუცია რუსეთმა 16 ნოემბერს დაბლოკა. რეზოლუციის მისაღებად გაეროს უშიშროების საბჭო 9 წევრის თანხმობა იყო საჭირო, ასევე მასზე ვეტო არ უნდა დაედო უშიშროების საბჭოს მუდმივ წევრებს - აშშ, საფრანგეთს, რუსეთს, ბრიტანეთს ან ჩინეთს.

რეზოლუციამ 12 ხმა მიიღო, თავი შეიკავა ჩინეთმა და ეგვიპტემ, რუსეთმან უშიშროების საბჭოს მუდმივი წევრის სტატუსით ვეტოს უფლება გამოიყენა და რეზოლუციის წინააღმდეგ მისცა ხმა. პროექტის წინააღმდეგ წავიდა ბოლივიაც. რუსეთს პრეტენზიები საგამოძიებო კომისიის მუშაობასთან აქვს.

სიარიაში ქიმიური იარაღის გამოყენების საქმის გამოძიებასთან დაკავშირებით ეს რუსეთის მეორე ვეტოა, პირველად გაეროს უშიშროების საბჭოში რუსეთმა ამ საკითხზე ვეტოს უფლება 24 ოქტომბერს გამოიყენა.

2017 წლის 4 აპრილს სირიის ქალაქ ხან-შეიხუნში მოსახლეობის წინააღმდეგ ქიმიური იარაღი, ზარინი გამოიყენეს. წინასწარმა გამოძიებამ დაადგინა, რომ ქიმიური თავდასხმა, რომელსაც 80-ზე მეტი ადამიანი ემსხვერპლა, სირიის მთავრობამ განახორციელა.