უკრაინამ შესაძლოა, რუსეთთან დიპლომატიური კავშირი გაწყვიტოს

მსოფლიო - 10:39, 08 Nov, 2017

3305

16 ნოემბერს უკრაინის უმაღლესმა რადამ მეორე მოსმენით უნდა განიხილოს დონბასის რეინტეგრაციის კანონპროექტი. ვრცელდება ინფორმაცია, რომ კანონპროექტს დაემატება პუნქტი, რომელშიც რუსეთთან დიპლომატიური კავშირის გაწყვეტაზეა საუბარი. შესაბამისი ცვლილება საკანონმდებლო ორგანოში „პეტრო პოროშენკოს ბლოკის“ დეპუტატმა ივან ვინიკმა შეიტანა. ინფორმაციას ამის შესახებ რუსული მედია ავრცელებს, უკრაინის ოფიციალურ პირებს ჯერჯერობით ამასთან დაკავშირებით განცხადება არ გაუვრცელებიათ.

რუსულ მედიას კანონპროექტის ავტორის კომენტარიც მოჰყავს, საცად ივან ვინიკი საკანონმდებლო ცვლილების მოტივზე საუბრობს:

„დონბასის რეინტეგრაციის კანონში, რომელიც რადამ მეორე მოსმენით უნდა განიხილოს, რუსეთი აღიარებული იქნება, როგორც აგრესორი ქვეყანა, ვიმედოვნებ რომ საკმარისი ხმები მოგროვდება. ამის შემდეგ კი დიპლომატიური ურთიერთობების გაგრძელება, უკრაინის საგარეო საქმეთა სამინიტროს მხრიდან უკვე დანაშაული იქნება, ეს ურთიერთობები ფაქტობრივად ისედაც გაწყვეტილია, ჩვენ გვჭირდება რომ ეს საკანონმდებლო დონეზე დავაფიქსიროთ.“- აცხადებს ივან ვინიკი.

კანონის მიღების შემთხვევაში, შემდეგი ეტაპი პრეზიდენტ პეტრო პოროშენკოს ბრძანება უნდა გახდეს დიპლომატიური ურთიერთობების გაწყვეტის შესახებ, რომლის შემდეგაც რუსეთი და უკრაინა შესაბამის დიპლომატიურ სამსახურებს დახურავენ. ორ ქვეყანას შორის შუამავლის როლს სავარაუდოდ ბელორუსი ან შვეიცარია შეასრულებს. შვეიცარია მედიატორის ფუნქციას ასრულებს საქართველო-რუსეთს შორის, ბელარუსი კი უკრაინის კრიზისის დროს, 2015 წელს ნორმანდიული ოთხეულის შეხვედრის მასპინძელი ქვეყანა იყო, სადაც მინსკის შეთანხმებას მოეწერა ხელი.