საუდის არაბეთი ირანთან შესაძლო ომზე ალაპარაკდა

მსოფლიო - 13:07, 06 Nov, 2017

2440

საუდის არაბეთი იემენიდან ერ რიადის მისამართით რაკეტის გაშვებას ირანის მხრიდან სამხედრო აგრესიად განიხილავს. საუდის არაბეთის თქმით, მათ თავდაცვის და ირანისთვის პასუხის გაცემის უფლება აქვთ. ამის შესახებ ნათქვამია არაბული კოალიციის განცხადებაში რომელიც Saudi Press Agency- ზე გამოქვეყნდა. საუდის არაბეთის წარმომადგენლების თქმით რაკეტის ფრაგმენტების შესწავლის შემდეგ ექსპერტებმა დაადასტურეს, ირანის მონაწილეობა რაკეტების წარმოებაში და იემენში ამბოხებული ჰუსიტებისთვის გადაცემაში.

"კოალიციის სარდლობა მიიჩნევს, რომ ირანის რეჟიმის მხრიდან სამხედრო აგრესიის აღმაშფოთებელი აქტი, მომავალში შესაძლოა განხილული იყოს, როგორც საომარი ქმედება საუდის არაბეთის სამეფოს წინააღმდეგ, რაც გამოიწვევს სამეფოს ლეგიტიმურ უფლებას დაიცვას თავისი ტერიტორია და ხალხი.“- აღნიშნულია განცხადებაში და ამავდროულად საუბარია გაეროს წესდების 51-ე მუხლზეც, რომელიც ქვეყანას თავდაცვის უფლებას ანიჭებს.

შეგახსენებთ, 4 ნოემბერს ერ რიადის აეროპორტის თავზე პატრიოტის სარაკეტო სისტემის კომპლექსით ჩამოაგდებული იქნა რაკეტა „ბურკან2“, რომელიც იემენის მხრიდან იყო გამოშვებული. აეროპორტი არ დაზიანებულა და ის ჩვეულ რეჟიმში აგრძელებს მუშაობას.