მშვენიერაძე მიუწოდებს კბილაშვილს, რომ მამუკა მიქაუტაძესთან დაკავშირებით გამოძიება შსს-გან მთავარმა პროკურატურამ გადაიბაროს. 

როგორც მშვენიერაძემ ჟურნალისტებს განუცხადა, გამოძიებას არ უნდა აწარმოებდეს ის უწყება, რომლის შიგნითაც სავარაუდოდ დანაშაული მოხდა.

"ამ საქმეს იძიებს შინაგან საქმეთა სამინისტრო. აუცილებლად მიგვაჩნია, რომ გამოძიებას აწარმოებდეს არა ის უწყება, რომლის შიგნითაც სავადაუდოდ დანაშაული მოხდა, არამედ სხვა უწყება. მთავარ პროკურორს აქვს იმის კომპეტენცია, რომ ამ საქმის გამოძიება გადააბაროს პროკურატურას", - განაცხადა მშვენიერაძემ.

მისივე თქმით, გამოძიება ასევე უნდა დაიწყოს მიქაუტაძის უკანონო დაკავებასთან დაკავშირებით.

"გამოძიება, გარდა იმ ვერსიისა, რაზეც ახლა მუშაობს, ეს არის თვითმკვლელობამდე მიყვანა, უნდა დაიწყოს ამ პირის უკანონო დაკავებასთან დაკავშირებითაც. ჩვენ მიგვაჩნია, რომ ეს პირი იყო უკანონოდ დაკავებული, რითაც საქართველოს სისხლის სამართლის საპროცესო კოდექსი დაირღვა. ასევე მის მიმართ ადგილი ჰქონდა წამებას და არადამიანურ მოპყრობას, სწორედ ასეთი მოპრყობა გახდა საფუძველი მის მიერ ჩვენების მიცემის, ხოლო ჩვენების შემდეგ კი, მან სიცოცხლე თვითმკვლელობით დაასრულა", - განაცხადა მშვენიერაძემ