"მონსტრი საბოლოოდ დამარცხებულია" - ლონდონის კანალიზაცია 250 მ სიგრძის ცხიმგროვისგან გაწმინდეს

მსოფლიო - 14:01, 04 Nov, 2017

5184

ლონდონის ხელისუფლების განცხადებით, თითქმის 70-დღიანი სამუშაოს შემდეგ შესაბამისმა სამსახურებმა აღმოსავლეთ ლონდონის კანალიზაცია 250 მეტრის სიგრძისა და 130 ტინა მასის გიგანტური ცხიმგროვისგან გაწმინდეს. ამ მასამ, რომელსაც ცხიმბერგი (ცხიმის აისბერგი) უწოდეს, ლონდონის რამდენიმე რაიონის კანალიზაციის გაჭედვა გამოიწვია.

ცხიმბერგი, რომელიც გაყინული ცხიმის, სველი ხელსახოცების, პრეზერვატივების, ბავშვის საფენებისა და სხვა მსგავსი საყოფაცხოვრებო ნარჩენებისგან შედგებოდა ვიქტორიანული ეპოქის საკანალიზაციო გვირაბში აგვისტოს ბოლოს აღმოაჩინეს.

ორი თვისა და ერთი კვირიანი ბრძოლის შემდეგ, კომპანია Thames Water-ის ხელმძღვანელობამ განაცხადა, რომ ეს მონსტრი საბოლოოდ დამარცხებულია. აღსანიშნავია, რომ სამუშაოების ბოლო ეტაპზე მუშებს ნიჩბების გამოყენება დასჭირდათ.

შესაბამისი სამსახურის წარმომადგენლები აცხადებენ, რომ ამგვარი ცხიმგროვების წარმოქმნა ლონდონელების ორი მავნე ჩვევის შედეგია - გამოყენებული ცხელი ცხიმის პირდაპირ სამზარეულოს ნიჟარაში ჩასხმისა და უნიტაზში იმ სახის გამოყენებული ნივთების ჩაყრა, როგორიცაა, სველი ხელსახოცები, პრეზერვატივები, ბავშვის საფენები და ა.შ.