"დინამო არენასთან" დაკავებული სამი პირის სასამართლო პროცესი დღეს გაიმართება

სამართალი - 09:07, 09 Jul, 2013

552

სხდომაზე ბრალდებული მხარის ინტერესებს იცავდა ადვოკატი გიორგი ონიანი, რომელმაც წარმოადგინა ის ფირი, სადაც ამ ადამიანების დაკავებაა ასახული. თავის მხრივ, მოსამართლემ ბრალდების მხარესაც სთხოვა ფირების წარმოდგენა, თუმცა ბრალდების მხარეს ეს მტკიცებულები არ აღმოაჩნდა. ამის შემდეგ მოსამართლემ მათ სამჯერ შესთავაზა, გაითხოვდნენ თუ არა შუამდგომლობას, თუმცა პატრულის თანამშრომლების მხრიდან უარი მიიღო. მათივე მოთხოვნით, სასამართლო სხდომა დღეისთვის გადაიდო.

"დინამო არენას" მიმდებარე ტერიტორიაზე დაკავებული სამი პირი თავს დამნაშავედ არ ცნობს. ისინი სასამართლო სხდომაზე აცხადებდნენ, რომ პოლიციის წინააღმდეგ არ გამოუყენებიათ შეურაცხმყოფელი სიტყვები და მხოლოდ მდუმარე აქციას მართავდნენ.

"პოლიციის მხრიდან იგრძნობოდა აგრესია. მათ დაგვიხიეს პლაკატი, სადაც ეწერა, რომ სამაჩაბლო და აფხაზეთი საქართველოს ტერიტორიაა. ამაში მონაწილეობას იღებდა მაიორი რუხაძე. ის ასევე მოგვიწოდებდა, რომ დავშლილიყავით. პოლიციის თანამშრომლებმა შეკრეს ჯაჭვი, საიდანაც გასვლის საშუალებას არ გვაძლევდნენ და ჩვენზე ახდენდნენ ფიზიკურ ზეწოლას. ისინი ჩვენს რამდენიმე აქტივისტს ხელითაც კი შეეხნენ", - აღნიშნა ერთ-ერთმა ბრალდებულმა ჩხირკვაიამ.

გუშინდელ სასამართლო სხდომაზე ასევე მოხდა მოწმეების დაკითხვა. მოწმეების განცხადებით, ისინი არ არღვევდნენ კანონს და კანონის სრული დაცვით მოქმედებდნენ. ერთ-ერთი მოწმის ბესიკ კალანდაძის განცხადებით, ისინი იმყოფებოდნენ ბორდიურზე, სადაც ადამიანებს მოძრაობა შეუძლიათ. გზის სავალი ნაწილი კი პოლიციის თანამშრომლებს გადაკეტილი ჰქონდათ.

"ისინი ჩვენს რამდენიმე აქტივისტს ხელითაც კი შეეხნენ, მათ შორის მანდილოსნებს. ერთ-ერთ გოგონას აღენიშნება ფიზიკური დაზიანებებიც კი, ხოლო დაკავებულ ჩხირკვაიას ცხვირიდან სისხლდენაც კი დაეწყო. ჩვენს მიმართ კი პოლიციელები ძალადობას იჩენდნენ და გვეუბნებოდნენ, რომ სასწრაფოდ უნდა დავშლილიყავით. გაუგებარია, რატომ უნდა დავშლილიყავით, ჩვენ ხომ გამოვხატავდით მხოლოდ ჩვენს აზრს", - განაცხადა მოწმის სტატუსით დაკითხულმა ბესიკ კალანდაძემ.

ამასთან, სხვა მოწმეები: ნინო ცისკარიშვილი და თამარ იოსელიანი აცხადებენ, რომ მათ კანონი არ დაურღვევიათ და პოლიციელების მხრიდან მათი მისამართით ადგილი ჰქონდა ძალადობას.