დონალდ ტრამპის წინასაარჩევნო შტაბის ყოფილ უფროსს პოლ მანაფორტს, აშშ-ის პროკურატურამ 12 ბრალდება წარუდგინა, სასამართლომ კი მას შინაპატიმრობა მიუსაჯა. ანალოგიური აღკვეთის ღონისძიება შეუფარდეს მანაფორტის ბიზნესპარტნიორ რიკ გეიტსაც. ისინი წაყენებულ ბრალს არ აღიარებენ.

ამერიკის შეერთებული შტატების წინააღმდეგ შეთქმულების გარდა, გამოძიება პოლ მანაფორტს ფულის გათეთრებას, ცრუ ჩვენების მიცემასა და უკრაინასთან დაკავშირებულ ჩრდილოვან გარიგებებში მონაწილეობას ედავება. თეთრ სახლში განაცხადეს, რომ მანაფორტისა და გეიტსის წინააღმდეგ წაყენებული ბრალდებები აშშ-ის პრეზიდენტს და მის 2016 წლის საარჩევნო კამპანიას არ უკავშირდება. თავად ტრამპმა სოციალურ ქსელ „ტვიტერში“ დაწერა, რომ ბრალდების ყველა პუნქტი საარჩევნო კამპანიის დაწყებამდე პერიოდს ეხება.