კატალონიის მიერ დამოუკიდებლობის გამოცხადებას მსოფლიო ლიდერები ეხმაურებიან

მსოფლიო - 20:12, 27 Oct, 2017

5311

კატალონიის პარლამენტის მიერ დამოუკიდებლობის გამოცხადებას მსოფლიო ლიდერები და ორგანიზაციები ეხმაურებიან.

ევროპული საბჭოს პრეზიდენტის დონალდ ტუსკის განცხადებით ევროკავშირისთვის ერთადერთ თანამოსაუბრედ ესპანეთი რჩება:

„ევროკავშირისთვის არაფერი შეცვლილა. ესპანეთი რჩება ჩვენ ერთადერთ თანამოსაუბრედ. მე ვიმედოვნებ, რომ ესპანეთის ხელისუფლება არგუმენტების ძალას მიანიჭებს უპირატესობას და არა ძალის არგიმენტს“- დაწერა ტუსკმა Twitter-ის საკუთარ გვერდზე.

აშშ-ის სახელმწიფო დეპარტამენტში აცხადებენ, რომ კატალონია ესპანეთის განუყოფელი ნაწილია:

„შეერთებული შტატები მხარს უჭერს ესპანეთის კონსტიტუციურ ღონისძიებებს, რომელიც მიმართულია იმისკენ, რმ ესპანეთმა შეინარჩუნოს ძლიერება და ერთიანობა“- განაცხადა სახელმწიფო დეპარტამენტის პრესმდივანმა ჰეიზერ ნოერტმა.

ჩრდილო-ატლანტიკური ალიანსი კატალონიის საკითხს ესპანეთის შიდა საქმედ მიიჩნევს, რომელიც კონსტიტუციური წესრიგის ფარგლებში უნდა გადაწყდეს:

„ესპანეთი რჩება ნატოს მნიშვნელოვან მოკავშირედ, კატალონია კი მისი შიდა საქმეა, რომელიც კონსტიტუციური წესრიგის ფარგლებში უნდა გადაწყდეს.“- განაცხადა ნატოს მაღალჩინოსანმა.

უკრაინის საგარეო საქმეთა მინისტრის პაველ კლიმკინის განცხადებით მისი ქვეყანა მხარს უჭერს ესპანეთის ტერიტორიულ მთლიანობას.

„უკრიანა მხარს უჭერს ესპანეთის სახელმწიფოს დამოუკიდებლობას და ტერიტორიულ მთლიანობას საერთაშორისოდ აღიარებულ საზღვრებში“- დაწერა კლიმკინმა ტვიტერზე, მის მიერ გავრცელებულ სხვა შეტყობინებაში ნათქვამია რომ უკრაინა მხარს უჭერს ესპანეთის ხელისუფლების მიერ კრიზისის მოგვარების ღონისძიებებს კონსტიტუციის შესაბამისად, კანონის ერთგულებით და ყველა მოქალაქის უფლებების პატივისცემით.