სახელისუფლო კორუფცია და ბიუროკრატია - აშშ-ს კონგრესის ორპარტიული რეზოლუცია საქართველოს შესახებ

პოზიცია - 11:09, 27 Oct, 2017

3220

კონგრესმენმა ტედ პომ და კონგრესმენმა ჯინ გრინმა 23 ოქტომბერს ორპარტიული რეზოლუცია წარადგინეს, რეზოლუცია, რომელიც კვლავ გამოხატავს ამერიკის შეერთებული შტატების მხარდაჭერას საქართველოს სახელმწიფოს მიმართ, ხაზს უსვამს და მიუთითებს ქვეყანაში, სახელისუფლო დონეზე კორუფციისა და ბიუროკრატიული არეულობის არსებობაზე.

„უკანასკნელი 25 წლის განმავლობაში საქართველო გადაიქცა რეგიონის დემოკრატიისა და თავისუფლების მოდელად. საქართველო კვლავ წარმოადგენს ამერიკის შეერთებული შტატების ერთგულ მხარდამჭერს. ჩვენმა ორმა ქვეყანამ შეიმუშავა სტრატეგიული პარტნიორობა, რომელიც დაფუძნებულია საერთო ღირებულებებზე. მე მომხრე ვარ უფრო მჭიდრო ურთიერთობისა ჩვენს ორ ქვეყანას შორის მომავალი მრავალი წლის განმავლობაში - და არ არსებობს უკეთესი გზა ამ ურთიერთობის გასამტკიცებლად, ვიდრე ორმხრივი ინვესტიციები და ვაჭრობა.

თუმცა, აღსანიშნავია, რომ უკანასკნელი რამდენიმე წლის განმავლობაში, ამერიკული კომპანიები წუხილს გამოთქვამენ საქართველოსთან საქმიან ურთიერთობებთან მიმართებით, ისინი მიუთითებენ ბიუროკრატიულ არეულობაზე და აცხადებენ, რომ საქართველოს ხელისუფლების გარკვეულ დონეებზე შემორჩენილია კორუფცია. როგორც საქართველოს ნამდვილ მეგობარს, შემიძლია გამოვთქვა არა მხოლოდ სიამაყე თბილისის პროგრესის მიმართ, ასევე, შემიძლია მივუთითო იმ კუთხით, როცა უფრო მეტია გასაკეთებელი, რათა საქართველო დაუბრუნდეს დემოკრატიულ ტრაექტორიას. აღნიშნული რეზოლუცია ამტკიცებს ჩვენს კავშირებს საქართველოს მოსახლეობასთან და მის ხელისუფლებასთან, ასევე მოუწოდებს შეიქმნას თანასწორი პირობები ამერიკული კომპანიებისთვის, რომლებიც საქართველოში მუშაობენ. ეს აუცილებლად მოუტანს სარგებლობას ორივე ქვეყანას და განამტკიცებს ჩვენს ორმხრივ ურთიერთობებს მრავალი წლის განმავლობაში“, - განაცხადა კონგრესმენმა პომ.

რაც შეეხება კონგრესმენ გრინს, ის იმედვნებს, რომ საქართველო დაიცავს კანონის უზენაესობას და აშშ-საქართველოს ურთიერთობები კვლავაც მტკიცე დარჩება.

„საქართველოს წინსვლა უკანასკნელი წლების განმავლობაში თვალნათელია, ნაწილობრივ ეს გამოწვეულია საქმიანი კლიმატით უცხოელი ინვესტორების მიმართ. ამერიკული კომპანიების მიმართ პასუხისმგებლობების გადაჭარბება ორ ქვეყანას შორის ურთიერთობების გაფუჭებას გამოიწვევდა, ურთიერთობებისა, რომელთა განმტკიცებასაც მრავალი წელია აშშ და საქართველო ცდილობენ. ვიმედოვნებ, რომ საქართველო მნიშვნელოვნად ჩათვლის კანონის უზენაესობას Frontera Resources-ის მიმართ და აშშ-საქართველოს ურთიერთობა მტკიცე დარჩება და იქნება მომგებიანი ორივე მხარისთვის“, - განაცხადა კონგრესმენმა გრინმა.