რუსი გულშემატკივარი, რომელიც თავდაპირველად სასტუმროდან გამოვიდა და საპროტესტო აქციის მონაწილეებთან ოპონირება დაიწყო, "ნიუპოსტს" სერგეი ლიჟინად გაეცნო და განუცხადა, რომ გულშემატკივართა კლუბის წარმომადგენელია.

თავდაპირველად "ნიუპოსტს" ლიჟინთან გასაუბრების უფლება საპატრულო პოლიციისა და სასტუმროს დაცვის წარმომადგენლებმა არ მისცეს, თუმცა მოგვიანებით, რუსმა გულშემატკივარმა თავად გამოიჩინა ინტერესი და აქციის მიმდინარეობითა და მიზნით დაინტერესდა.

აქციის ერთ-ერთმა მონაწილემ მას განუმარტა, რომ პროტესტი მიმართული იყო არა უშუალოდ ფეხბურთელების წინააღმდეგ, არამედ რუსეთის დუმის დეპუტატებისა და იმ გულშემატკივრების წინააღმდეგ, რომლებმაც "დინამო არენაზე" ჰუსართა ცნობილი ფრაზის ("წინ, ჰუსარებო, გაჟიმეთ და დაბრიდეთ!") შემცველი სტიკერები საქართველოს ერთიანობის აღმნიშვნელ სტიკერებს გადააკრეს.

ლიჟინი სტიკერის ილუსტრაციით დაინტერესდა, ხოლო მას შემდეგ, რაც "ნიუპოსტმა" ინტერნეტში გავრცელებული სტიკერის ფოტო უჩვენა, განაცხადა, რომ "ეს მაგარი სტიკერია და რუსულ სულს წარმოაჩენს", ხოლო სტიკერს ქვეშ მოქცეულ ინგლისურენოვან სტიკერზე, საქართველოს დროშის გამოსახულებით განაცხადა: "ეს სტიკერი, რომელზეც ჩვენია გადაკრული ტერორისტების სტიკერია. მასზე გამოსახულია ადამიანი ნიღბით (სინამდვილეში სტიკერზე გლადიატორის სილუეტია გამოსახული და ინგლისურად წერია: "აფხაზეთი საქართველოა!") და რახან ადამიანს სახე არ უჩანს, ის ტერორისტია, სულ ეს არის".

ლიჟინის განმარტებას შორიახლოს მდგარი აქციის მონაწილეების გაღიზიანება მოჰყვა, რის შემდეგაც მოსკოვის "დინამოს" ფანკლუბის წარმომადგენელი სასტუმროს ფოიეში პოლიციელებმა შეაცილეს.