აქციაზე, ძირითადად, ახალგაზრდები იყვნენ შეკრებილი, თუმცა, მათ სტადიონიდან გამოსული მაყურებლების ნაწილიც შეუერთდა. აქციის მონაწილეები ცალსახად განმარტავდნენ, რომ მათი პროტესტი არა რუსი ფეხბურთელებისა და ზოგადად, მოსკოვის "დინამოს" ჩამოსვლის, არამედ რუსეთის სახელმწიფო დუმის წევრების წინააღმდეგ იყო მიმართული.

სტადიონის შესასვლელებთან საპატრულო პოლიციის დამატებითი კონტიგენტი იყო მობილიზებული, მათ აქციის მონაწილეებს არ მისცეს სტადიონთან ახლოს მისვლის უფლება და დაუხიეს პლაკატები. "ნიუპოსტის" ინფორმაციით, ამ დროისთვის დაკავებულია აქციის მონაწილე სამი პირი, "თავისუფალი ზონის" წევრები: ირაკლი ჩხვირკია, დავით გოგოხია და ლაშა რუხაია. სტადიონის "ვიპ" გასასვლელთან, სადაც აღნიშნული ორგანიზაციის აქტივისტები საპროტესტო აქციას მართავდნენ, აქციის მონაწილეებს პოლიციელებმა მოუწოდეს, რომ გზის სავალი ტერიტორია დაეტოვებინათ და ტროტუარზე გადასულიყვნენ, რასაც პოლიციელებსა და აქციის მონაწილეებს შორის ფიზიკური გაწევ-გამოწევა მოჰყვა. აქციის ერთ-ერთმა მონაწილემ გზაზე დაწოლა სცადა, თუმცა სამართალდამცველებმა ამისი უფლება არ მისცეს.

ამასთან, როგორც აქციის მონაწილეები აცხადებენ, პატრულის ერთ-ერთმა თანამშრომელმა მათ პლაკატი დაუხია, რომელზეც ეწერა "ერთიანი საქართველო ოკუპანტების გარეშე".აქციის მონაწილე გოგონები ამბობენ, რომ პოლიციამ მათ ხელები გადაუგრიხა, პლაკატები წაართვა და სტადიონის ტერიტორიას განარიდა.

აქციის მონაწილეთა დაკავების შესახებ ინფორმაციას საპარლამენტო უმცირესობის წევრი მარიამ საჯაიაც ადასტურებს. "როგორც მითხრეს, გოგოებს ხელები აქვთ დალურჯებული, ყველა პლაკატი დახეულია, აი, აზრის გამოხატვის თავისუფლების ნიმუში", - ამბობს დეპუტატი.