სომხეთის პრეზიდენტმა რუსეთ-სომხეთის ერთობლივი საჯარისო ქვედანაყოფის შექმნის კანონს ხელი მოაწერა.

მსოფლიო - 16:02, 23 Oct, 2017

2718

სომხეთის პრეზიდენტმა სერჟ სარგსიანმა 23 ოქტომბერს ხელი მოაწერა კანონს რუსეთ-სომხეთის არმიების ერთობლივი ქვედანაყოფის შექმნის შეთანხმების რატიფიკაციის შესახებ. ასევე სომხეთი შეუერთდა რუსეთ-ბელორუსის სახელმწიფოთაშორისო საფინანსო-სამრეწველო ჯგუფს - "თავდაცვითი სისტემები".

ამ შეთანხმებებს მხარეებმა 2016 წლის ნოემბერშ მოწერეს ხელი. რუსეთის დუმამ მათი რატიფიკაცია 14 ივლისს მოახდინა, ხოლო სომხეთის პარლამენტმა - 5 ოქტომბერს.

რუსეთ-სომხეთის ერთობლივი სამხედრო დაჯგუფების ამოცანაა რუსეთსა და სომხეთზე შეიარაღებული სამხედრო თავდასხმის მომზადების დროული აღმოჩენა, მისი მოგერიება, სახელმწიფოთა სახმელეთო საზღვრის დაცვა, რუსეთისა და სომხეთის საზღვრის დაცვა საჰაერო კოსმოსურ სივრცეში. ასევე, საარმიო ქვედანაყოფების ჰაერსაწინააღმდეგო თავდაცვით სისტემებში ერთობლივი მონაწილეობა, ქვეყნების კრიტიკულად მნიშვნელოვანი ობიექტების დაცვა, რომელიც რეგიონშია განთავსებული.

მშვიდობიან პერიოდში მას სომხეთის გენშტაბის უფროსი უხელმძღვანელებს, ხოლო ომის დროს - რუსეთის სამხრეთის ჯარების სარდალი.

რაც შეეხება შეთანხმების მეორე ნაწილს, რუსეთ-ბელორუსისის საფინანსო-სამრეწველო ჯგუფის - "თავდაცვითი სისტემების" ამოცანაა ინტეგრირებული სამეცნიერო-ტექნიკური, სამრეწველო და საინვესტიციო პოტენციალის გამოყენება თავდაცვითი სისტემების თანამედროვე ნიმუშების წარმოებაში. შეთანხმების შედეგად ამ ჯგუიფს სომხეთიც შეუერთდება.