36 წლის მამაკაცმა პოლიციის ზეწოლის გამო თავი ჩამოიხრჩო

სამართალი - 18:38, 06 Jul, 2013

1227

ოჯახის წევრების განცხადებით, ღამით ის პოლიციამ დააკავა და რამდენიმე საათის განმავლობაში მთავარ სამმართველოში დაკითხვაზე იმყოფებოდა. თვითმკვლელობამდე ახალგაზრდა კაცმა ოჯახის წევრებს დაურეკა და უთხრა, რომ წამებით პოლიციამ მეგობრის საწინააღმდეგო ჩვენება მიაცემინა.

"როგორც ვიცი, 36 წლის მამაკაცი გუშინ ღამით მოხვდა სამმართველოში, იქ სცემეს და ზეწოლას ვერ გაუძლო, დაურეკა ოჯახს და მეგობარს - მივდივარო. იატაკზე დაგდებული სცემეს და რაღაცაზე მოაწერინეს ხელი. გუშინდელი ზეწოლის შემდეგ, მამაკაცმა დარეკა და თქვა, წყალში შევცურე, მაგრამ თავი ვერ დავიხრჩვე და ახლა თოკი ვიყიდე, თავი უნდა ჩამოვიხრჩოო", – აცხადებს გარდაცვლილის მეზობელი.

შინაგან საქმეთა სამინისტროს საზოგადოებასთან ურთიერთობის სამსახურის უფროსის ნინო გიორგობიანი ა დასტურებს ინფორმაციას იმის შესახებ, რომგარდაცვლილი გუშინ დაკითხვაზე იყო.

"დაკითხვის შემდეგ გაუშვეს სახლში. მას წინასწარვე განემარტა, რომ მოწმის სახით დაკითხვის შემდეგ გაუშვებდნენ. რაც შეეხება დღევანდელ ფაქტს, ამაზე აღძრულია სისხლის სამართლის საქმე 115-ე მუხლით. პოლიციელების მხრიდან ამ პირზე რაიმე სახის ზეწოლა არ დაფიქსირებულა" , – აცხადებს გიორგობიანი.

აღნიშნულის თაობაზე ინფორმაციას "რუსთავი 2" ავრცელებს.

შეგახსენებთ, რომ ამის შესახებ ინფორმაცია უმცირესობის ერთ-ერთმა წევრმა დავით საყვარელიძემაც გაავრცელა სოციალური ქსელის მეშვეობით.