უკრაინის რადას წევრების დელეგაციისა და პრეზიდენტ პეტრო პოროშენკოს შეხვედრა ჩაიშალა. დეპუტატებს პრეზიდენტთან რადასთან შეკრებილი მომიტინგეების მიერ დაყენებული სამი საკითხის შესახებ უნდა ესაუბრათ.

პრეზიდენტის ადმინისტრაციაში მისულ პარლამენტარებს განუცხადეს, რომ პრეზიდენტი შეხვდებოდა მხოლოდ სამ მათგანს - სერგეი ლეშჩენკოს, მუსტაფა ნაიემსა და სვეტლანა ზალიშუკს, ხოლო უფრაქციო დეპუტატებთან, იური ლევჩენკოსა და იური დერევიანკოსთან შეხვედრაზე უარი განაცხადა.

პრეზიდენტისგან ამგვარი პასუხის მოსმენის შემდეგ ხუთივე დეპუტატმა განაცხადა, რომ ისინი ასეთ პირობაზე თანახმა არ იყვნენ და შეხვედრაში მხოლოდ სრული შემადგენლობით მიიღებდნენ მონაწილეობას.