კრემლი პუტინის მთავარ კონკურენტს იშორებს - ნავალნის საპრეზიდენტო არჩევნებში მონაწილეობის უფლებას არ აძლევენ

მსოფლიო - 12:13, 18 Oct, 2017

1363

რუსეთის პრეზიდენტის არჩევნებამდე 4 თვით ადრე, კრემლმა პუტინის კონკურენტების მთავარი ინტრიგა გადაწყვიტა. რამდენიმეთვიანი არასაჯარო კონსულტაციების შემდეგ გადაწყდა, რომ პუტინის მთავარი ოპონენტი, კორუფციასთან ბრძოლის ფონდის დამფუძნებელი ალეკსეი ნავალნი კანდიდატად ვერ დარეგისტრირდება.

განცხადება იმის შესახებ, რომ ნავალნის არჩევნებში მონაწილეობა შეუძლებელია, რუსეთის ცენტრალური საარჩევნო კომისიის თავმჯდომარე ელა პამფილოვამ სოჭში, ახალგაზრდულ ფესტივალზე, სამშაბათს გააკეთა.

პამფილოვამ ნავალნი დაადანაშაულა ხელისუფლებაზე ზეწოლაში და თქვა,რომ მას ქუჩის საპროტესტო აქციები ვერ აიძულებს, დაარღვიოს კანონი - „ცუდია ის, თუ კარგი“. რუსეთის ხელისუფლება ამტკიცებს, რომ ნავალნის ფინანსურ დანაშაულთან დაკავშირებულ „კიროვლესის“ საქმეზე ნასამართლეობის გამო არა აქვს 2018 წლის საპრეზიდენტო არჩევნებში მონაწილეობის უფლება. პამფილოვას თქმით ნავალნის საპრეზიდენტო არჩევნებში მონაწილეობა მხოლოდ 2028 წლისთვის შეეძლება.

ალეკსეი ნავალნიმ საპრეზიდენტო არჩევნებში მონაწილეობის შესახებ განცხადება ჯერ კიდევ 2016 წლის დეკემბერში გააკეთა. საპრეზიდენტო არჩევნებისათვის ნავალნის კანდიდატურის დასახელებას მხარი დაუჭირა 600 ათასამდე ადამიანმა. რუსეთის რეგიონებში გახსნილია ოპოზიციონერი პოლიტიკოსის 79 საარჩევნო შტაბი, მიმდინარეობს აქტიურ აგიტაციაც. ნავალნიმ და მისმა მომხრეებმა ამ დროის განმავლობაში შეძლეს მრავალათასიანი აქციების მოწყობაც.

ნავალნის თანაგუნდელების თქმით, მათ კანდიდატს საპრეზიდენტო არჩევნებში მონაწილეობის კანონიერი უფლება აქვს, რადგან საპრეზიდენტო არჩევნებში კანდიდატად მონაწილეობა მხოლოდ იმ პირებს ეზღუდებათ, ვინც სასჯელაღსრულების დაწესებულებაში იმყოფება. ნავალნის კი მხოლოდ პირობითი სასჯელი აქვს.

ალეკსეი ნავალნი ერთ-ერთი ყველაზე ცნობადი ოპოზიციონერი პოლიტიკოსია რუსეთში. ლევადა-ცენტრის მიერ ივლისში რუსეთში ჩატარებული გამოკითხვის შედეგად მის შესახებ ინფორმაცია გამოკითხულთა 55% აქვს.