საკონსტიტუციო ცვლილებების საყოველთაო-სახალხო განხილვის კომისია თსუ-ში შეხვედრას გამართავს

საზოგადოება - 15:48, 05 Jul, 2013

362

შეხვედრა უნივერისტეტის იურიდიული ფაკულტეტის, საქართველოს პარლამენტის იურიდიულ საკითხთა კომიტეტისა და საერთაშორისო საქმეთა ეროვნულ-დემოკრატიული ინსტიტუტის (NDI) ორგანიზებით ტარდება, სადაც "საქართველოს კონსტიტუციაში ცვლილებების შეტანის შესახებ" საქართველოს კონსტიტუციური კანონის სამი პროექტის ირგვლივ მსჯელობა გაიმართება.
შეხვედრა შედგება 6 ივლისს, შაბათს, 13 საათზე, ივანე ჯავახიშვილის სახელობის თბილისის სახელმწიფო უნივერსიტეტის II კორპუსში, აუდიტორია N135.

საკონსტიტუციო ცვლილების პირველი პროექტის თანახმად, საქართველოს პრეზიდენტის, პრემიერ–მინისტრისა და პარლამენტის თავმჯდომარის თანამდებობის დაკავების უფლება ექნება საქართველოს ნებისმიერ მოქალაქეს, მიუხედავად იმისა, აქვს თუ არა მას ორმაგი მოქალაქეობა; მეორე ცვლილების პროექტი პარლამენტის მიერ მთავრობის შემადგენლობაში ცვლილებების შეტანაზე კონტროლის ამჟამად მოქმედი წესის შენარჩუნებას და ბიუჯეტის კანონის მიღებასთან დაკავშირებულ ახლებურ რეგულაციებს ითვალისწინებს; ხოლო მესამე ცვლილების პროექტის თანახმად, შენარჩუნდება კონსტიტუციაში ცვლილებების შესატანად ამჟამად მოქმედი კვორუმი – 2/3, ნაცვლად 2013 წლის საპრეზიდენტო არჩევნების შემდეგ ასამოქმედებელი ხმათა ¾–ისა.