ძველ დროში ადამიანებს არ უყვარდათ პარასკევი, ხოლო თუ მას 13 რიცხვს ემთხვეოდა, მათ კიდევ უფრო ეშინოდათ, რომ ზებუნებრივი და სატანური ძალები მათ ზიანს მიაყენებდნენ. ხალხი ამ დღეს "შავ პარასკევს" უწოდებდა.

ყველაზე თვალსაჩინო მაგალითი ამ ცრურწმენის გავლნისა 1989 წელს მოხდა. 13 იანვარს ამოქმედდა ვირუსი, რომელმაც დიდი ბრიტანეთის ასობით კომპიუტერი გამოიყვანა მწყობრიდან. მას "პარასკევი, 13" დაარქვეს და ცრუმორწმუნეები დიდი ხნის განმავლობაში ერიდებოდნენ ამ დღეს კომპიუტერის ჩართვას. თუმცა ამ ფაქტმა საფუძველი ჩაუყარა ანტივირუსული ინდუსტრიის აქტიურად დანერგვასა და განვითარებას.

რაც შეეხება ამ ცრურწმენას, იგი დასაბამს შუა საუკუნეებიდან იღებს, თუმცა, მას თავისი გავლენა ახლაც აქვს. "შავი პარასკევის" და საერთოდ ცრურწმენების ყველაზე მეტად სახიფათო პროფესიის ადამიანებს ეშინიათ.

თავის მხრივ, როგორც პარასკევი, ასევე რიცხვი 13 ცალცალკე სარგებლობენ "ცუდი რეპუტაციით".

პარასკევის ცუდი რეპუტაცია ქრისტიანული რწმენიდან მომდინარეობს, რადგან იესო ქრისტე ჯვარზე სწორედ პარასკევს გააკრეს. ძველ დროში პარასკევ დღეს ადამიანები არც რიმე ახალ საქმიანობას იწყებდნენ და არც სერიოზულ შეხვედრებსა თუ მოლაპარაკებებს აწარმოებდნენ.

რაც შეეხება "13"-ს მას შუა საუკუნეებში "ეშმაკის რიცხვს" უწოდებდნენ. დღესაც ბევრ სასტუმროს არ აქვს 13-ე ნომერი, ზოგიერთ თვითმფრინავში არ არსებობს 13-ე რიგი და ა.შ. მეტიც, ითვლება, რომ თუ რაიმე ღონისძიებას ან თუნდაც სუფრას 13 ადამიანი ესწრება, იგი უიღბლოდ ჩაივლის, რადგან ეს რაოდენობა საიდუმლო სერობის მონაწილეთა რიცხვს ემთხვევა, რომლის შემდეგაც იესო იუდამ გასცა.

გადმოცემის თანახმად ალქაჯების წვეულება - "შაბაში" ლეგენდის მიხედვით პარასკევს 13-ში იმართება, სადაც 12 ჯადოქარი იკრიბება ერთად და შეკრებილთა შორის მეცამეტე თვით სატანა იყო.

მითების პოპულარიზაციამ ეს ორი ცრურწმენა გააერთიანა და კალენდარში გაჩნდა ე.წ. ყველაზე უიღბლო დღე, რომლითაც ყველაზე კარგად ჰოლივუდი, სხვა კინომწარმოებლები თუ მწერლები სარგებლობენ და უამრავ საშინელებათა ფილმს თუ რომანს უშვებენ.

შეგახსენებთ, რომ უახლოეს 3 წელიწადში 13 და პარასკევი ერთმანეთს შემდეგ დღეებში ემთხვევა: 2018 წ. -აპრილი და ივლისი; 2019 წ. - სექტემბერი და დეკემბერი; 2020 წ. - მარტი და ნოემბერი. ალბათ ისინი, ვისაც ამ ცრურწმენების სჯერა ალბათ დიდი შიშით მოელის ამ დღეებს.