ბაჩო ახალაიას პროცესის ბრალდების მოწმე ისევ საეჭვო ვითარებაში გაუჩინარდა

სამართალი - 11:26, 05 Jul, 2013

955

როგორც ონიანმა დღეს გამართულ ბრიფინგზე განაცხადა, ეს მას შემდეგ მოხდა, რაც ბრალდების მოწმემ აღიარა, რომ პროკურატურა მას ბაჩო ახალაიას წინააღმდეგ ცრუ ჩვენების მიცემას აიძულებდა.

მოწმე ლევან სუთიძემ პროცესზე განაცხადა, რომ ის პროცესამდე რამდენიმე დღით ადრე, სავარაუდოდ სამხედრო პოლიციის თანამშრომლებმა საბურთალოს ტერიტორიიდან, საკუთარი საცხოვრებელი სახლიდან წაიყვანეს, ტყეში, წყნეთის მიმართულებით და უთხრეს, შეხსენება ხომ არ ჭირდებოდა თუ რა ჩვენება უნდა მიეცა დაგეგმილ პროცესზე.

გოგა ონიანის თქმით, მოწმე ლევან სუთიძე სასამართლო პროცესზე მიცემული ჩვენების შემდეგ გაუჩინარდა, გათიშულია მისი მობილური ტელეფონები და მის საცხოვრებელ ბინაშიც არავინ იმყოფება.

ამასთან, გოგა ონიანის ინფორმაციით, სუთიძეს სოციალური ქსელის მეშვეობით ერთ-ერთი ჟურნალისტი დაუკავშირდა სასამართლო პროცესის შემდეგ და მან ჟურნალისტს უთხრა, რომ ინტერვიუს ვერ მისცემდა იქიდან გამომდინარე, რომ უკვე ბევრი პრობლემა ჰქონდა.

ლევან სუთიძე იაღლუჯის სამხედრო ბაზის ექიმად მსახურობდა.

ახალაიას ადვოკატები მომხდარის გამოძიებას მოითხოვენ საზოგადოებრივ მაუწყებელს მოუწოდებენ, მიმდინარე სასამართლო პროცესები გადაიღონ, რადგან პროცესის მიმართ საზოგადოების მაღალი ინტერესი არსებობს.