-ამის შესახებ "ნიუპოსტს" ზუგდიდელმა მამაკაცმა უთხრა, რომელიც მცირე ბიზნესითაა დაკავებული და ტექნიკის მაღაზია აქვს. მამაკაცის თქმით, მისი მაღაზია ზუგდიდის ცენტრში მდებარეობს:

"იმისთვის, რომ ჩემს მაღაზიაში მოხვდეთ, ერთი დიდი ობიექტი უნდა გაიღოს (რედაქცია შეგნებულად არ ასახელებს პირის ვინაობას და მისი მაღაზიის ადგილსამყოფელს). როცა ღამით დამირეკეს და მითხრეს, რომ მაღაზია უნდა გამეღო, რადგან იქ აუცილებლად უნდა შეეძინათ ახალი ვიდეოფირები, მე ვუთხარი, რომ ეს ჩემზე არ იყო დამოკიდებული.

ტელეფონში მიპასუხეს, რომ ვიზეც იყო დამოკიდებული, უკვე გაფრთხილებული ჰყავდათ და ობიექტი ღია დამხვდებოდა. კი გამიკვირდა, მაგრამ როცა მანქნა გამომიგზავნეს, გავყევი. თითო ფირი 12 ლარად მივყიდე, მერე მაღაზია დავკეტე და სახლში წამიყვანეს", - იხსენებს ზუგდიდელი გ. ა.-ია. მაღაზიის მფლობელი აცხადებს, რომ შსს-ს მიერ გავრცელებული კადრები არა მეორე დღეს, არამედ გვიან, ინტერნეტში ნახა და ვიდეოფირების დამამზედებელი ფირმის ლოგოტიპები ემთხვევა მის მიერ გაყიდული ფირების მწარმოებელი ფირმების დასახელებებს.

მისივე თქმით, ფირები ჩვეულებრივი მინიკასეტები იყო: "ასეთ კასეტებს ჩემგან, ძირითადად, ქორწილების გადასაღებად ყიდულობენ".
გ.ა.-იას თქმით, მყიდველებს შორის ადგილობრივი პოლიციის მაღალჩინოსანი ამოიცნო, თუმცა, მის სახელსა და გვარს ვერ იხსენებს: "ზუსტად ვიცი, რომ პოლიციაში მუშაობს და ისიც ვიცი, რომ ოქტომბრის არჩევნების მერე, როცა პოლიციის ხელმძღვანელობა შეიცვალა, ეგ დანიშნეს, მაგრამ სახელსა და გვარს ვერ ვიხსენებ", - ამბობს "ნიუპოსტთან" საუბარში გ.ა.-ია. მისი თქმით, ზემოთაღწერილი ფაქტები 15 ან 16 ივნისს, ღამით მოხდა.

შეგახსენებთ, რომ 17 ივნისს შსს-მ გააკეთა განცხადება სამეგრელოში ცეცხლსასროლი იარაღის, საბრძოლო მასალებისა და ასაფეთქებელი ნივთიერებების, ასევე ნარკოტიკული საშუალებებისა და საიდუმლო ჩანაწერების აღმოჩენის შესახებ. განცხადების თანახმად, ნაპოვნი იქნა ვიდეოფირებიც, სადაც ცალკეული პირების მიმართ ფიზიკური და სექსუალური ძალადობის ფაქტები იყო აღბეჭდილი.