კატალონიის ლიდერმა ესპანეთის მეფე კატალონიელების აზრის უგულვებელყოფაში დაადანაშაულა

მსოფლიო - 10:53, 05 Oct, 2017

2491

კატალონიის ლიდერმა კარლეს პუდჩემონმა ესპანეთის მეფე კატალონიელების აზრის უგულვებელყოფაში დაადანაშაულა, თუმცა დიალოგისთვის მზადყოფნა გამოთქვა და საერთაშორისო საზოგადოებას შუამავლის როლის შესრულებისკენ კიდევ ერთხელ მოუწოდა.

“ჩვენ არ ვეთანხმებით სახელმწიფოს მეთაურის მიმართვას, რომელმაც მარიანო რახოის პოლიტიკას დაუჭირა მხარი და შეგნებულად მოახდინა განსხვავებულად მოაზროვნე კატალონიელების იგნორირება, რომლებიც მათი მოსაზრებისგან განსხვავდება“ - განაცხადა კარლეს პუჩდემონმა.

ესპანეთის მეფემ, ფელიპე მეექვსემ მოსახლეობას ტელევიზიით მიმართა და ადგილობრივი ხელისუფლებას უპასუხისმგებლო უწოდა.

მეფის თქმით, კატალონიის ხელისუფლების უპასუხისმგებლო ქმედებებმა, შესაძლოა, ესპანეთის ეკონომიკურ სტაბილურობას შეუქმნას საფრთხე.

მისივე თქმით, ესპანეთში სიტუაცია ძალიან სერიოზულია და მოსახლეობას ერთიანობისკენ მოუწოდა.

ეპანეთის მეფემ განაცხადა, რომ რეფერენდუმი უკანონო იყო.

ესპანეთის მთავრობისა და საკონსტიტუციო სასამართლოს მიერ არაკანონიერად ცნობის მიუხედავად, 1 ოქტომბერს კატალონიაში დამოუკიდებლობისადმი მიძღვნილი რეფერენდუმი ჩატარდა. ხმის მიცემა ესპანურ პოლიციასთან დაპირიპირებისა და შეტაკებების ფონზე მიმდინარეობდა. შეტაკებების შედეგად , ბოლო მონაცემებით, 800-ზე მეტი ადამიანი დაშავდა.

კატალონიის მთავრობის განცხადებით, რეფერენდუმში მონაწილეთა უმრავლესობამ, ხმა კატალონიის დამოუკიდებლობას მისცა. ესპანეთის ხელისუფლება კატალონიის რეფერენდუმს არ აღიარებს . რეფერენდუმს არალეგიტიმურად მიიჩნევს ევროკომისიაც.

ავტონომიის პრეზიდენტის კარლეს პუჩდემონის თქმით კი, კატალონია დამოუკიდებლობას უახლოეს დღეებში გამოაცხადებს