უკრაინის ხელისუფლება საქართველოში ჩემი ექსტრადირების საკითხს სპეკულირების მიზნით იყენებს- სააკაშვილი

მსოფლიო - 10:49, 04 Oct, 2017

3442

საქართველოს ყოფილი პრეზიდენტისა და ოდესის ოლქის ყოფილი გუბერნატორის მიხეილ სააკაშვილის თქმით, უკრაინის ხელისუფლება საქართველოში ექსტრადირების შესაძლებლობის შესახებ ინფორმაციას სპეკულირების მიზნით იყენებს. ამის შესახებ სააკაშვილმა "NEWS ONES"-ის ეთერში განაცხადა.

"ახალ ძალთა მოძრაობის" ლიდერმა სააკაშვილმა დაადასტურა, რომ უკრაინის საემიგრაციო სამსახურს დამატებითი დაცვის მოთხოვნით მიმართა . მისი თქმით, აღნიშნული გადაწყვეტილება მას შემდეგ მიიღო, რაც საზღვრის გადმოკვეთისას მესაზღვრეებმა მისი პასპორტის შემოწმებაზე უარი თქვეს.

მისი განცხადებით, ფორმალური პროცედურა იმისთვის გამოიყენა, რომ უკრაინაში ყოფნის კანონიერ საფუძველი ჰქონოდა.

სააკაშვილი მოსახლეობას გუშინ ქალაქ როვნოში შეხვდა, სადაც უკრაინის პრეზიდენტს ქვეყანაში შექმნილი ეკონომიკური და პოლიტიკური კრიზისის გადაჭრისკენ მოუწოდა.

„უკრაინის ხელისუფლება თავიდანვე მემუქრებოდა, რომ თუკი ქვეყანაში ჩამოვიდოდი, საზღვარზე დამაკავებდნენ და ქართულ მხარეს გადამცემდნენ. საქართველოს ხელისუფლება კიდევ უფრო სუსტია ვიდრე უკრაინის და ჩემი იქ ჩასვლის ეშინია. უკრანული მხარე ამ საკითხს სპეკულირების მიზნით იყენებს. პოლიტიკური თავშესაფრის მოთხოვნით უკრაინას მივმართე, რათა ჩემი ქვეყანაში ყოფნის კანონიერი საფუძველი მქონოდა. მოქალაქეობის არქონა ხელს არ მიშლის იმაში, რომ უკრაინის რეგიონებში შეხვედრები განვაგრძო და ათასობით ადამიანს შევხვდე. 17 ოქტომბერს კი უკრაინის პრეზიდენტს მთელ რიგ კონკრეტულ მოთხოვნებს გადავცემთ. თუკი ის ხალხის მოთხოვნებს არ გაითვალისწინებს, მაშინ ვურჩევ გადადგომის ვარიანტი განიხილოს”-განაცხადა მიხეილ სააკაშვილმა.