შავნაბადას მთაზე სამშობლოსთვის დაღუპული მეომრების სულის მოსახსენიებელი პარაკლისი აღევლინება

საზოგადოება - 10:30, 02 Jul, 2013

593

ამის შესახებ გენერალთა კლუბის მიერ გავრცელებულ განცხადებაშია აღნიშნული.

"საქართველოს გენერალთა კლუბს აქვს პატივი შეახსენოს საზოგადოებას, რომ უკვე 20 წელია, ყოველ 2 ივლისს, აღინიშნება აფახაზეთის ომში კინდღი-ლაბრა-ტამიშის რაიონში რუსული საზღვაო დესანტის მოგერიების და განადგურების ოპერაციაში მონაწილე და დაღუპული მებრძოლების ხსენების დღე. დამოუკიდებელი საქართველოს უახლეს ისტორიაში ეს იყო ერთ-ერთი ყველაზე მსხვილმასშტაბიანი და სისხლისმღვრელი საბრძოლო მოქმედებები, სადაც ჯერ კიდევ ჩამოუყალიბებელ ქართულ საბრძოლო შენაერთებს რუსეთის ელიტარული სპეცდანიშნულების ნაწილების და მათ მიერ მომზადებული ე.წ. "კონფედერატების" საბრძოლო შენაერთების წინააღმდეგ ბრძოლა მოუწიათ. ამ ბრძოლაში ქართველი მეომრების თავგანწირვამ და თავდადებამ შეაცბუნა და გაოგნებაში მოიყვანა მოწინააღმდეგე, რის შედეგადაც ჩაიშალა და დიდი ხნით გადაიდო რუსეთის გენერალურ შტაბში დაგეგმილი მოულოდნელობის ეფექტის მატარებელი სიღრმისეული დესანტის გადმოსხმის და მისი განვითარების გეგმები. დღეს გმირთა მოედანზე დიდების მემორიალთან მოხდება შეკრება, ხოლო შემდეგ შავნაბადას მთაზე წმ. გიორგის სახელობის ტაძარში სამშობლოსთვის დაღუპული ქართველი მეომრების სულების მოსახსენიებელი პარაკლისი აღევლინება", - ნათქვამია განცხადებაში.