"მივიღე ინფორმაცია, რომ პოროშენკო ჩემთვის მოქალაქეობის ჩამორთმევას აპირებს"

"მივიღე ინფორმაცია, რომ პოროშენკო ჩემთვის მოქალაქეობის ჩამორთმევას აპირებს" - დავით საყვარელიძე

მსოფლიო - 13:58, 25 Sep, 2017

1863

უკრაინის გენერალური პროკურორის ყოფილი მოადგილე და პარტია „რუხ ნოვიხ სილის“ ერთერთი ლიდერი, დავით საყვარელიძე აცხადებს, რომ უკრაინის პრეზიდენტი მისთვის მოქალაქეობის ჩამორთმევას აპირებს. ამის შესახებ საყვარელიძე ფეისბუკზე იტყობინება.

„ახლახან მივიღე არაოფიციალური და ჯერჯერობით დაუზუსტებელი ინფორმაცია იმის შესახებ, რომ პეტრო პოროშენკო აპირებს მოქალაქეობა ჩამომართვას მე , ასევე მისადმი არალოიალურად განწყობილ რამდენიმე პირს , მათ შორის ვართ ისინი, ვისაც ორი წლის წინ ეს მოქალაქეობა მანვე მოგვანიჭა.

მე ძალიან მაშინებს ჩვენი ქვეყნის ბედი, რომელსაც კლინიკური პარანოიით დაავადებული ადამიანი მართავს. ის არის მთავარსარდალიც, კონსტიტუციის გარანტიც და ომის მონაწილე ქვეყნის ლიდერიც.

არ დაგიმალავთ, ველოდი მოვლენების ასეთ განვითარებას, მაგრამ ბოლო მომენტამდე ვფიქრობდი, რომ პოროშენკო საკუთარი იმიჯისა და რეპუტაციისთვის ასეთ მავნე პოლიტიკურ გადაწყვეტილებას არ მიიღებდა. ადამიანის სახელმწიფოსთან დამაკავშირებელი ყველაზე მთავარი სიმბოლოს - პასპორტისა და მოქალაქეობის ფეხქვეშ გათელვა , მასთან „როშენის“ შოკოლადივით მოქცევა, ძალიან ცუდი საქციელია. ეს არ შეშვენის არც მამაკაცს, არც პრეზიდენტს და არც მთავარსარდალს.

ვიდრე ხელისუფლებაში ღირსეული ხალხი არ მოვა, მოქალაქეების უფლებების დასაცავად, ქვეყანაში სამართლიანი სასამართლო არ შეიქმნება, მე იძულებული ვიქნები ჩემი მოქალაქეობის აღდგენისთვის ახლანდელ ფსევდოდემოკრატიულ სასამართლოებში ვიბრძოლო.

ვრჩები ფეისბუკის მსოფლიო მოქალაქედ))“ - წერს საყვარელიძე.