ჩრდილოეთ კორეამ, აშშ-ის პოლიტიკის საპასუხოდ, წყნარ ოკეანეში ყველაზე მძლავრი წყალბადის ბომბი შეიძლება გამოსცადეს. ამის შესახებ ქვეყნის საგარეო საქმეთა მინისტრმა ლი იენ ხომ განაცხადა.

კითხვაზე, თუ რა ზომები შეიძლება მიიღოს ფხენიანის ლიდერმა კიმ ჩენ ინმა აშშ-ს პრეზიდენტის დონალდ ტრამპის განცხადებებზე საპასუხოდ, ჩრდილოეთ კორეის საგარეო უწყების ხელმძღვანელმა განაცხადა, რომ „ეს შეიძლება იყოს წყალბადის ბომბის ყველაზე მძლავრი აფეთქება წყნარ ოკეანეში. ჩვენ არ ვიცით, რა ზომები იქნება მიღებული, გადაწყვეტილებებს კიმ ჩენ ინი მიიღებს.“

შეგახსენებთ, გაეროში სიტყვით გამოსვლისას, ტრამპმა განაცხადა, რომ აშშ-ის დიდი მოთმინება აქვს, თუმცა თუ იძულებული გახდება საკუთარი თავი, ან მოკავშირეები დაიცვას, ჩრდილოეთ კორეის ტოტალური განადგურების გარდა, არჩევანი აღარ რჩება.

ტრამპის განცხადებას "ძაღლის ყეფა" უწოდა ჩრდილოეთ კორეის საგარეო საქმეთა მინისტრმა.

ჩრდილოეთ კორეის ლიდერმა კიმ ჩენ ინმა კი ტრამპს „შეშლილი მოხუცი“ უწოდა და ცეცხლით განადგურებით დაემუქრა.