ჩრდილოეთ კორეის საგარეო საქმეთა მინისტრმა , აშშ-ის პრეზიდენტის დონლად ტრამპის მუქარა , საჭიროების შემთხვევაში ფხენიანის ტოტალური განადგურების შესახებ, „ძაღლების ყეფას“ შეადარა.

ლი იონ ჰოს განცხადებით, ტრამპის მუქარას ფხენიანში არაფრად აგდებენ.

„არის ასეთი გამოთქმა, ძაღლი ყეფს, ქარავანი მიდის. თუ დონალდ ტრამპს ჩვენი გაოცება ძაღლის ყეფით სურდა, ეს ნამდვილად ძაღლის ოცნება იყო" - განაცხადა ლი იონ ჰომ.

"გარდიანის" ცნობით, ლი იონ ჰო, ნიუ იორკში ჩავიდა, სადაც გაეროს გენერალური ასამბლეის 72-ე სესიაზე სიტყვით გამოსვლას გეგმავს.

შეგახსენებთ, გაეროს გენერალურ ასამბლეაზე, აშშ-ის პრეზიდენტმა დონალდ ტრამპმა განაცხადა, რომ თუკი აშშ-ს მოთმინება ამოეწურება, ჩრდილოეთ კორეას გაანადგურებს.

"ამერიკის შეერთებულ შტატებს უდიდესი ძალა და მოთმინება აქვს, მაგრამ თუ ის იძულებულია საკუთარი თავი, ან მოკავშირეები დაიცვას, ჩრდილოეთ კორეის ტოტალური განადგურების გარდა, არჩევანი აღარ გვრჩება" - განაცხადა ტრამპმა.