NATO-ს გენერალური მდივნის მოადგილე საჯარო დიპლომატიის საკითხებში ტაცან ილდემი აცხადებს, რომ ალიანსი უარყოფითად არ აფასებს თურქეთის მიერ რუსული სარაკეტო კომპლექსის, С-400-ის შეძენას და არ მიაჩნია, რომ ამის გამო თურქეთი ჩრდილოატლანტიკური უსაფრთხოების სისტემიდან გადის და რუსეთს უახლოვდება.

"თურქეთის მიერ С-400-ს შეძენა არ ადასტურებს იმ ფაქტს რომ თურქეთი NATO-ს ან დასავლურ ინსტიტუციებს შორდება და რუსეთს უახლოვდება, ქვეყანის ხელისუფლებამ არაერთხელ განაცხადა, რომ ის ალიანსს ერთგულ მოკავშირედ მიიჩნევს. ამასთან, NATO-ს წევრ ქვეყნებს უფლება აქვთ თავად განსაზღვრონ შეიარაღების სახეობები და ის, თუ ვისგან შეიძენს სამხედრო ტექნიკას. ამასთან თურქეთს არ უთხოვია, რომ რუსული რაკეტები ალიან სის ერთიან სისტემაში ყოფილიყო ჩართული," - განაცხადა ილდემმა.

გარდა ამისა, ალიანსის მაღალჩინოსანმა ევროკავშირსა და მის ლიდერებს მოუწოდა, ნუ დაიკავებს ხისტ პოზიციას თურქეთთან მიმართებაში, განსაკუთრებით მოერიდოს იმ სახის განცხადებებს, რომ თურქეთი არასდროს გახდება ევროკავშირის წევრი.