აღძრულია სისხლის სამართლის საქმე, აქციის ყველა მონაწილე უნდა გამოცხადდეს პოლიციაში

აღძრულია სისხლის სამართლის საქმე, აქციის ყველა მონაწილე უნდა გამოცხადდეს პოლიციაში - არსენ ავაკოვი

მსოფლიო - 18:38, 11 Sep, 2017

2383

უკრაინის შინაგან საქმეთა მინისტრი, მოუწოდებს ყველა ადამიანს, ვინც, 10 სექტმებერს „შეგინის“ გამშვებ პუნქტთან საზღვარი უკანონოდ გადაკვეთა, საბაჟო კონტროლის გასავლელად გამოცხადნენ.

„ ყველა, ვინც გუშინ საზღვარი უკანონოდ გადაკვეთა, „შეგინის“ გამშვებ პუნქტთან უნდა გამოცხადდეს, რათა საბაჟო კონტროლის გაფორმების პროცედურა გაიარონ. გარკვეული რაოდენობის ხალხმა ეს უკვე გააკეთა, მათ შორის ჟურნალისტებმა და უცხოელებმა, რომლებიც მიხვდნენ, როგორ ვითარებაში აღმოჩნდნენ“ - განაცხადა ავაკოვმა.

სასაზღვრო სამსახურის უფროსის, პეტრო ციგიკალის გაცნხადებით, 11 სექტმებერს საბაჟო კონტროლის გასავლელად 6 ადამიანი გამოცხადდა.

" ეროვნულმა პოლიციამ აღძრა სისხლის სამართლის საქმე 204-ე მუხლის შესაბამისად და მოვითხოვთ, რომ აქციის მონაწილე ყველა პირი მივიდეს პოლიციაში ჩვენების მისაცემად. კარგი იქნება, თუ ამას თავად გააკეთებენ. თუ არ გამოცხადდებიან, ყველა მონაწილეს უკვე დღეიდან გაეგზავნება შესაბამისი მოთხოვნა. გუშინდელ მოვლენებს გენპროკურატურა და შინაგან საქმეთა სამინისტრო სახელმწიფო დანაშაულის კვალიფიკაციას აძლევს " - განაცხადა ავაკოვმა.

უკრაინული მედიის ცნობით, ადმინისტრაციული კოდექსის 204-ე მუხლი ჯარიმას ან 15 დღემდე ადმინისტრაციულ პატიმრობას ითვალისწინებს. თუმცა ამ მუხლის მოქმედება არ ვრცელდება უკრაინაში ჩასულ უცხოელებზე ან მოქალაქეების არმქონე პირებზე.

შეგახსენებთ, 10 სექტემბერს, მიხეილ სააკაშვილი უკრაინაში ჩავიდა. უკრაინა-პოლონეთის საზღვარზე სერიოზული დაბრკოლებების მიუხედავად სააკაშვილმა მისი გადაკვეთა მაინც შეძლო. " შეგინის" სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს და სააკაშვილი უკრაინის ტერიტორიაზე გადაიყვანეს, რის შემდეგაც მიხეილ სააკაშვილი, მხარდამჭერებთან ერთად ლვოვში ჩავიდა.