გაეროში აშშ-ის მუდმივმა წარმომადგენელმა ნიკი ჰეილიმ შესაძლოა, სახელმწიფო მდივნის პოსტზე რექს ტილერსონი შეცვალოს. ამის შესახებ Foreign Policy სახელისუფლებო წყაროზე დაყრდნობით წერს.

გამოცემის ინფორმაციით, მსგავსი ვარაუდი მას შემდეგ გაჩნდა, რაც ბოლო რამდენიმე კვირაა, სახელმწიფო მდივანი საჯაროდ არ გამოჩენილა, არც მნიშვნელოვან საკითხებთან დაკავშირებით გაუკთებია კომენტარი. მაგალითად, ჩრდილოეთ კორეის მიერ წყალბადის ბომბის გამოცდის შემდეგ, რექს ტილერსონს საკუთარი მოსაზრება არ დაუფიქსირებია, განსხვავებით ნიკი ჰეილისგან, რომელმაც ძალიან მკაცრი განცხადება გააკეთა. ნიკი ჰეილიის განცხადებით, ჩრდილოეთ კორეის ლიდერი კიმ ჩენ ინი ომის დასაწყებად ყველაფერს აკეთებს და დროა, გაერთიანებული ერების ორგანიზაციამ ფხენიანთან ყველაზე მკაცრი ზომები მიიღოს.

„აშშ-ის ომი არასოდეს სურდა, ჩვენ არც ახლა გვსურს ის. მაგრამ ჩვენი ქვეყნის მოთმინება უსაზღვრო არ არის. ჩვენ დავიცავთ ჩვენს მოკავშირეებსა და ჩვენს ტერიტორიას“ - განაცხადა ჰეილიმ.

რექს ტილერსონის შესაძლო გადადგომის შესახებ ინფორმაცია ივლისის ბოლოს გავრცელდა. მიზეზად კი დონალდ ტრამპთან არსებული უთანხმოება დასახელდა.