შვედეთის ხელისუფლებამ 106 წლის ავღანელ ქალს თავშესაფრის მოთხოვნა არ დაუკმაყოფილა. შესაბამისად, მას ქვეყნიდან დეპორტაცია ემუქრება.

როგორც გარდიანი წერს, შვედეთის მიგრაციის სამსახურის განცხადებით, ავღანეთი უსაფრთხო ქვეყნების სიაშია, შესაბამიდან მხოლოდ ასაკის გამო, მას თავშესაფარს ვერ მისცემენ.

შვედეთში არსებული ლტოლვილების დამხარების ცენტრი კი ქალის მხარდამჭერ წერილს აქვეყნებს და აცხადებს, რომ ბევრ ქვეყანაში, რომელიც უსაფრთხო ქვეყნების სიაშია, ამჟამად გაცილებით ცუდი ვითარებაა.

„მიგრაციის სამსახური განმარტავს, რომ ავღანეთში არასაკმარისი საფრთხე არსებობს“ - ნათქვამია წერილში.

106 წლის ბიბიჰაილ უზბეკის ოჯახის წევრებმა ხელისუფლების გადაწყვეტილება უკვე გაასაჩივრეს.

როგორც AP იტყობინება, 2015 წლანდე, სანამ უზბეკის ოჯახი ევროპაში ჩავიდოდა, რვა წლის განმავლობაში არალეგალურად ირანში ცხოვრობდა, სადაც ავღანეთში არსებული არასტაბილური ვითარების გამო ჩავიდა. 106 წლის ქალი, კი რომელსაც დამოუკიდებლად გადაადგილება და სიარული უჭირს, შვედეთში შვილისა და შვილიშვილის დახმარებით ჩავიდა. მომავალ კვირას მას 107 წელი უსრულდება.

ამჟამად უზბეკი მის 11 ნათესავთან ერთად, ქვეყნის ცენტრალურ ნაწილში, პატარა სოფელში ცხოვრობს.

როგორც მისი ოჯახის წევრბი აცხადებენ, ქალის ჯანმრთელობის მდგომარეობა მას შემდეგ გაუარესდა, რაც გაიგო, რომ შვედეთის ხელისუფლებამ თავშესაფარზე უარი განუცხადა.

„როდესაც უარი მოვიდა, ჩემმა დებმა ტირილი დაიწყეს. ბებიამ ჰკითხა, რატომ ტიროდნენ, თუმცა ეს ამბავი დავუმალეთ. მოგვიანებით გაიგო, რომ მისი მოთხოვნა უარყოფილია . შედეგად, კიდევ უფრო ცუდად გახდა და ინსულტი მიიღო“ - ამბობს მისი შვილიშვილი 22 წლის მუჰამედ უზბეკი.

106 წლის ქალის ბედი შვედეთის სააპელაციო სასამართლომ უნდა გადაწყვიტოს.