ამერიკის შეერთებული შტატების სახელმწიფო დეპარტამენტის წარმომადგენელი აცხადებს, რომ რუსული მხარის განცხადება, თითქოსდა ამერიკელები რუსეთის დიპლომატიური კორპუსის შენობებში კარების შემტვრევით იმუქრებოდნენ, სინამდვილეს არ შეეფერება.

მისი თქმით, აშშ სრულად იცავს ვენის კონვენციას, ამერიკის კანონებსა და იმ ორმხრივ შეთანხმებას, რომელიც ამგვარ სიტუაციებს არეგულირებს.

„აშშ-ის ხელისუფლების მოქმედება რუსეთის დიპლომატიური კორპუსის საკუთრების მიმართ არის მხოლოდ შემოვლა და ინსპექტირება“, - აცხადებს აშშ-ის სახელმწიფო დეპარატამენტის მაღალჩიონოსანი.

„რუსმა დიპლომატებმა აშშ-ის სახელმწიფო დეპარტამენტის თანამშრომლებთან ერთად ვაშინგტონში, სან-ფრანცისკოსა და ნიუ-იორკში მდებარე საელჩოები დაათვალიერეს, რათა დარწმუნებულიყვნენ, რომ შენობები ნამდვილად ცარიელია. ეს გაკეთდა შენობების უსაფრთხოებისა და დაცვის მიზნით“, - აცხადებს სახელმწიფო დეპარტამენტის წარმომადგენელი.

1 სექტემბერს, ამერიკის შეერთებულ შტატებში რუსეთის სამი დიპლომატიური ობიექტის დახურვის შესახებ გადაწყვეტილება პირადად პრეზიდენტმა დონალდ ტრამპმა მიიღო. აშშ-ს ეს ნაბიჯი ერთგვარი პასუხია რუსეთის ფედერაციის პრეზიდენტის ვლადიმირ პუტინის გადაწყვეტილებაზე, რომლის თანახმად რუსეთის შეერთებული შტატების დიპლომატიური მისიის პერსონალი 755 ადამიანით შემცირდა.

2 სექტემბერს, მედიის ყურადღება სან-ფრანცისკოში რუსეთის საკონსულოს შენობის საკვამურიდან ამომავლმა შავმა კვამლმა მიიპყრო. ჟურნალისტებმა ვარაუდი გამოთქვეს, რომ საკონსულოს თანამშრომლები ჩხრეკის მოლოდინში გარკვეულ დოკუმენტებს წვავდნენ.