რუსული გამოცემა Ведомости-ს ცნობით, რუსეთის პრეზიდენტობის კანდიდატი შესაძლოა ქალი გახდეს. შესაძლო კანდიდატებს კი კრემლში არჩევენ. გამოცემის ცნობით, პრეზიდენტის ადმინისტრაციაში მსჯელობენ იმაზე, რომ პუტინის მთავარი მეტოქე არჩევნებში ქალი იყოს. როგორც სტატიაშია საუბარი, მათ უკვე ჰყავთ 7 კანდიდატი, ერთერთ კანდიდატად კი ცნობილი სკანდალური ჟურნალისტი ქსენია სობჩაკი განიხილება.

"იდეალური ვარიანტი - ქსენია სობჩაკია, რომელიც იმ თანამედროვე ახალგაზრდა რუსი ქალბატონის იმიჯის დემონსტრირებაა, რომელსაც პოლიტიკაში წასვლა სურს"- წერს გამოცემა.

აღნიშნული ინფორმაცია უარყო თავად ჟურნალისტმა. სობჩაკმა განცხადება ინსტაგრამზე გააკეთა და იმ გამოცემების მიმართ საყვედური გამოთქვა, რომლებმაც მისი საპრეზიდენტო არჩევნებში სავარაუდო მონაწილეობის შესახებ დაწერეს. ჟურნალისტის თქმით, ეს აბსურდული ინფორმაციაა.

"მათ არ ჩათვალეს საჭიროდ, ჩემთვის რამე ეკითხათ და ინფორმაცია ამის შემდეგ გაევრცელებინათ. წერენ, რომ კრემლში ჩემს კანდიდატურას განიხილავენ, მაგრამ არ ვიცი, ვინ რას განიხილავს კრემლის კაბინეტებში. მე თავისუფალი ადამიანი ვარ და ამით ვამაყობ. არ ვიცი რას განიხილავენ მაღლა, კაბინეტებში - არ ვიცი, მაგრამ დიდი ხანია ჩვენს პოლიტიკურ ლანდშაფტს ყურადღებით ვაკვირდები. და ერთი დიაგნოზი მაქვს - ჩვენი დღევანდელი პოლიტიკა, ნაგავია. მოსაწყენი და უსიამოვნო “ - დაწერა სობჩაკმა.

აღსანიშნავია, რომ ქსენია სობჩაკი რუსეთის პრეზიდენტის, ვლადიმირ პუტინის პოლიტიკისა და რეჟიმის დიდი კრიტიკოსია.