ჩრდილოეთ ოსეთის მესაზღვრეებმა, ზემო ლარსის საკონტროლო გამშვებ პუნქტზე, საქართველოს მოქალაქე ე.წ. კანონიერი ქურდი დააკავეს. ამის შესახებ რუსული სააგენტო „რია ნოვოსტი“ რუსეთის ფედერაციის უსაფრთხოების სამსახურის სასაზღვრო სამმართველოს პრესსამსახურზე დაყრდნობით იტყობინება.

„ჩრდილოეთ ოსეთის სასაზღვრო უსაფრთხოების სამსახურის თანამშრომლებმა, ქართული წარმომავლობის , კრიმინალური სამყაროს ერთერთი ლიდერი დააკავეს, რომელიც საზღვრის გადაკვეთას ყალბი დოკუმენტებით ცდილობდა” - ნათქვამია უწყების განცხადებაში.

გამოცემის ცნობით, მამაკაცმა საპასპორტო კონტროლის გავლისას ჯერ რუსეთის საზღვარგარეთის პასპორტი წარადგინა, რომლის ვალიდურობაშიც მესაზღვრეებმა ეჭვი შეიტანეს. ეჭვის საპასუხოდ, რომ პასპორტი შესაძლოა, აღნიშნულ პირს არ ეკუთვნოდეს, მან აზერბაიჯანის მოქალაქის პასპორტი წარადგინა, სრულიად განსხვავებული მონაცემებით.

„გარემოებების გარკვევისას დაკავებულს თან აღმოაჩნდა სრულად ან ნაწილობრივ ყალბი დოკუმენტების რამდენიმე კომპლექტი და არ აღმოაჩნდა ნამდვილი პირადობის მოწმობა“ -აღნიშნულია უწყების განცხადებაში.

გავრცელებული ცნობით, თანამშრომლებმა დაადგინეს, რომ დაკავებული პირი, რომელიც საზღვრის გადაკვეთას ცდილობდა, საქართველოს მოქალაქეა, რომელიც არაერთხელ არის ნასამართლევი როგორც საქართველოში, ასევე რუსეთში.

„დაკავებულის ნათესავებს ასევე კავშირი აქვთ დანაშაულებრივ საქმიანობასთან, კერძოდ, რუსეთის ტერიტორიაზე ნარკოტიკით ვაჭრობასთან” - ნათქვამია განცხადებაში.