ამერიკული სააგენტო Bloomberg-ი თვლის რომ რუსეთის პრეზიდენტის ვლადიმერ პუტინის ახალი ფავორიტი 35 წლის რუსეთის ეკონომიკური განვითარების მინისტრი მაქსიმ ორეშკინია. სააგენტო ამ ინფორმაციას პუტინთან დაახლოებული სამი ჩინოვნიკის განცხადებაზე დაყრდნობით ავრცელებს.

გამოცემა თვლის, რომ რუსთი ამჟამად საკრედიტო რეცესიაშია და ამ მდგომარეობიდან გამოსასვლელად მას რადიკალური სტრუქტურული და ეკონომიკური რეფორმები სჭირდება. ორეშკინს ამ მიმართულებით ფართო უფლებამოსილება გააჩნია, თუმცა, როგორც ჩანს, ჯერ მათი დაწყების აუცილებლობაში ჯერჯერობით "ბოსი" ვერ დააჯერა.

"ჩვენ უნდა შევქმნათ მომავლის სამინისტრო, რომლის მთავარი დანიშნულება - ახალი ძალების მოზიდვა და მათთვის განვითარების შესაბამისი გარემოს შექმნაა," - განუცხადა Bloomberg-ს ორეშკინმა, თუმცა, ჟურნალისტის კითხვას, არის თუ არა იგი პუტინის ფავორიტი, მან არ უპასუხა.

Bloomberg-ი თვლის, რომ ორეშკინის გუნდის მთავარი ფიგურები არიან ეკონომიკის სამინისტროს ახალი კადრები ეკატერინა ვლასოვა Citigroup-დან, ზოია ვიქტოროვა PWC-დან და იულია უროჟაევა McKinsey-დან.

რუსული ეკონომიკისა და საფინანსო ბაზრის წარმომადგენლები ორეშკინს, მისი ახალგაზრდობის მიუხედავად, პატივს სცემენ. რა ადგილს დაიკავებს პუტინის ფავორიტი რუსეთის პოლიტიკურ დაფაზე, ამას უახლოესი მომავალი გვიჩვენებს.