რუსეთის პრეზიდენტმა ვლადიმირ პუტინმა აშშ-ში რუსეთის ახალ ელჩად, საგარეო საქმეთა მინისტრის მოადგილე ანატოლი ანტონოვი დანიშნა.

ანტონოვმა სერგეი კისლიაკი შეცვალა, რომელმაც საკუთარი მისია 22 ივლისს დაასრულა.

აღსანიშნავია, რომ აშშ-ის საპრეზიდენტო არჩევნებში რუსეთის შესაძლო ჩარევასთან დაკავშირებით სკანდალში, კისლიაკი ფიგურირებდა. მასთან სატელეფონო საუბრის გამო, თანამდებობა დატოვა უსაფრთხოების საკითხებში ტრამპის მრჩეველმა მაიკლ ფლინმა.

დღესვე ცნობილი გახდა, რომ რუსეთის მოქალაქეებისთვის აშშ-ის არასამიგრაციო ვიზების გაცემა შეჩერებულია.

აშშ-ის საელჩოს მიერ გავრცელებული ინფორმაციის თანახმად, ვიზების გაცემის პროცედურა მთელი რუსეთის მასშტაბით 23 აგვისტოს შეწყდება და პირველ სექტემბერს აღდგება. პირველი სექტემბრიდან აშშ-ის არასაიმიგრაციო ვიზის აღება მოსკოვში მდებარე აშშ-ის საელჩოში იქნება შესაძლებელი. თუმცა, რუსეთში მდებარე საკონსულოებში აშშ-ის ვიზების გაცემა გაუსაზღვრელი ვადით შეწყდება.

როგორც საელჩოს განცხადებაშია საუბარი, აღნიშნული გადაწყვეტილება უკავშირდება , რუსეთის პრეზიდენტის გადაწყვეტილებას, რუსეთში აშშ-ის დიპლომატიური მისიის თანამშრომელთა რაოდენობის შემცირების შესახებ.

ივლისის ბოლოს რუსეთის ფედერაციის პრეზიდენტმა, ვლადიმირ პუტინმა განცხადა, რომ შეერთებული შტატების დიპლომატიური მისიის პერსონალი 755 ადამიანით შემცირდება.

აღნიშნული გადაწყვეტილება რუსეთის ფედერაციამ აშშ-ის წინააღმდეგ კონტრსანქციების საფუძველზე მიიღო. სიაში როგორც დიპლომატები, ასევე ტექნიკური პერსონალი მოხვდნენ.