ბარსელონას ტერაქტში ეჭვმიტანილი კამბრილსში მოკლულთა შორისაა- იძებნება 22 წლის იუნეს აბუიაკუბი

მსოფლიო - 11:03, 19 Aug, 2017

5017

ბარსელონას ტერაქტის მოწყობაში მთავარი ეჭვმიტანილი მუსა უკაბირი, იმ 5 პირს შორისაა, რომელთა ლიკვიდაციაც ესპანეთის პოლიციამ კამბერლისში ტერაქტის აღკვეთის დროს მოახდინა. სწორედ მან იქირავა მინივენი, რომელიც ხუთშაბათს ბარსელონას ტურისტულ ცენტრში, რამბლას ბულვარზე ხალხის მასაში შეიჭრა, რის შედეგადაც 13 ადამიანი დაიღუპა და 100 ზე მეტი ადამიანი დაშავდა. ტრაგედიის შემდეგ პოლიციამ ძებნა 4 პირზე გამოაცხადა, თუმცა ახლა იტყობინება, რომ ძებნაში რჩება მხოლოდ ერთი - 22 წლის იუნეს აბუიაკუბი.

17 წლის მუსა უკაბირი ესპანეთის მოქალაქეა და ის ქალაქ ჟირონაში სამხრეთ კატალონიაში ცხოვრობდა. დანარჩენი ეჭვმიტანილების უმრავლესობას მაროკოს მოქალაქეობა აქვთ.

გამოძიების მონაცემების თანახმად, მუსა უკაბირმა თავისი ძმის დოკუმენტებით იქირავა ორი ავტომობილი, ერთი ტერაქტის მოწყობისთვის გამოიყენა, მეორით კი მიიმალა. მუსას ძმის მტკიცებით, დოკუმენტაცია, რომლითაც ფურგონის დაქირავება მოხდა მას ძმამ მოპარა.

ბარსელონას ტერაქტამდე ერთი დღით ადრე ბარსელონასთან ახლოს მდებარე ქალაქ ალკანარეში საცხოვრებელი სახლი აფეთქების შედეგად დაინგრა. პოლიციის ინფორმაციით აღნიშნულ სახლში ტერაქტების განსახორციელებლად ბომბებს ამზადებდნენ, ასაფეთქებელი საშუალებების განადგურების შემდეგ ტერორისტებმა ტერაქტის მოწყობა ავტომობილის საშუალებით გადაწყვიტეს.

ბარსელონას ტერაქტზე პასუხისმგებლობა ე.წ „ისლამურმა სახელმწიფომ“ აიღო.

ესპანეთში განხორციელებული ტერორისტული აქტის მონაწილეები, მათი ასაკი 17-დან 24 წლამდეა.