ორდღიანი კრიტიკის შემდეგ, აშშ-ის პრეზიდენტმა დონალდ ტრამპმა ვირჯინიის არეულობასთან დაკავშირებით ოფიციალური განცხადება გააკეთა.

ტრამპმა ქალაქ შარლოტსვილში მომხდარი შეტაკებები დაგმო და რასიზმს ბოროტება უწოდა.

"რასიზმი ბოროტებაა, ხოლო ისინი, ვინც სჩადიან ბოროტებას მისი სახელით - კრიმინალები და ბოროტმოქმედები არიან. ისინი, ვინც სიძულვილს აღვივებენ, მათ შორის თეთრი რასის აღმატებულობის იდეის მომხრეები, ეწინააღმდეგებიან ყველაფერს, რაც ამერიკელებისთვის ძვირფასია."

ჩვენ ვგმობთ სიძულვილის, შეუწყნარებლობისა და ძალადობის ამ გამოვლინებას. ამის ადგილი ამერიკაში არ არის“ - განაცხადა ტრამპმა, რომელმაც შვებულება ნაადრევად შეწყვიტა და თეთრ სახლში დაბრუნდა.

პრეზიდენტი აქციებს პირველივე დღეს გამოეხმაურა, თუმცა პოლიტიკოსებმაც და საზოგადოების წარმომადგენლებმაც განაცხადეს, რომ მისი სიტყვები ნეონაცისტების და კუკლუს-კლანის წევრების მიმართ სათანადოდ მკაცრი არ იყო.

გასული კვირის ბოლოს ვირჯინიის შტატის ქალაქ შარლოტსვილში ნაციონალისტების აქცია გაიმართა ,რომელსაც ანტიფაშისტების კონტრაქცია მოჰყვა, რაც არეულობაში გადაიზარდა. რის გამოც შარლოსტვილში საგანგებო მდგომარეობა გამოცხადდა.