ირანი რუსეთს მძიმე შეიარაღების კომპონენტებს აწვდის და გაეროს უშიშროების საბჭოს რეზოლუციას არღვევს.

ამის შესახებ გერმანული გამოცემა Die Welt-ი დასავლური სპეცსამსახურებიდან წყაროზე დაყრდნობით იტყობინება.

გამოცემის მტკიცებით, ივნისში, ირანული თვითმფრინავები სირიაში მდებარე ჰმეიმის ავიაბაზაზე ორჯერ დაეშვა. აღნიშნულ ბაზაზე რუსული ავიაციაა განთავსებული.

გერმანული გამოცემის ცნობით, ტვირთი სირიის ქალაქ ტარტუსში გადაიტანეს, იქიდან კი სამხედრო ხომალდმა რუსეთის ტერიტორიაზე გადაიტანა. რა სახის ტექნიკაზეა საუბარი, უცნობია.

აღნიშნული ინფორმაციის მტკიცებულებად, გამოცემას თანამგზავრიდან გადაღებული ფოტო მოჰყავს და აცხადებს, რომ ფოტოზე ჰმეიმის ბაზაზე ირანული თვითმფრინავია ასახული.

ირანისა და რუსეთის აღნიშნული ქმედება არღვევს გაეროს უშიშროების საბჭოს 2231 რეზოლუციას, რომელიც 2015 წლის ივლისში მიიღეს და რომელიც ირანის მიმართ შემზღუდავ ღონისძიებებს ითვალისწინებს, ბირთვულ პროგრამასთან დაკავშირებით მიღწეული შეთანხმების ფარგლებში.