კალაძის ისედაც დაცემულ რეიტინგს ,,ოცნების“ შიდადაპირისპირებაც ემატება. ინფორმირებული წყაროები არაერთ საკითხზე ამახვილებენ ყურადღებას, თუმცა მახვილს მაინც თბილისის ე.წ. გენგეგმაზე სვამენ, რომლის „გაპიარებაც“ ნარმანიამ თავისი მერობის მიწურულს დაიწყო და რომლის გაგრძელებას, კულუარული ინფორმაციით, კალაძეც ფიქრობს.

ნარმანიას ერთ-ერთი მთავარი საარჩევნო დაპირება, მილიონი ხის დარგვასთან ერთად, გენგეგმის შექმნაც იყო, თუმცა გეგნგეგმა რატომღაც სამი წლის შემდეგ გაახსენდა. აი, მილიონი ხე კი, როგორც პოლიტიკურ კულუარებში ქილიკობენ, კი არ დარგა, არამედ მოჭრა.

„რომელ გამწვანებაზეა საუბარი, როცა თბილისი მკვდარ ქალაქს ჰგავს? ისე არ გამიგოთ, რომ ყველაფერს ნარმანიას ვაბრალებ, მაგრამ იგივე იპოდრომზე ხეები სწორედ ნარმანის მერობის დროს მოიჭრა. თავიდან ითქვა, რომ ამ ვანდალიზმის გამო გამოძიება დაიწყო, მაგრამ არავინ დასჯილა. არადა, როგორც მე მაქვს ინფორმაცია, უშუალოდ იპოდრომის გაპარტახება და გავერანება იმ ადამიანების კისერზეა, ვინც თბილისის მიწათსარგებლობის გეგნეგმის პროექტის შემუშავებაში აქტიურად არიან ჩართლები. ჰოდა, სამართლიან ქვეყანაში რომ ვცხოვრობდეთ, ეს ადამიანები გენგეგმის პროექტის შექმნისთვის ბიუჯეტიდან მილიონებს კი არ უნდა იჯიბავდნენ, არამედ, მინიმუმ, დაკითხვებზე უნდა დადიოდნენ, მაგრამ ჩვენი მთელი უბედურებაც სწორედ ის არის, რომ ამ ქვეყანაში შერჩევითი სამართალია“, - ამბობს კონფიდენციალური წყარო, რომელიც ზემოაღნიშნულ საკითხებში კარგად ერკვევა, თუმცა მისივე თქმით, ძველი ტრადიცია გრძელდება და, ხელისუფლება პროფესიონალებს ახლოსაც არ იკარებს.

„ისე არ გაიგოთ, რომ თითქოს განაწყენებული ვარ, მაგრამ ჟურნალისტები ხართ და, აბა, ერთი დაინტერესდით, იგივე თბილისის მთავარ არქიტექტორს ან იმ ადამიანებს, რომლებსაც თბილისის გენგეგმის პროექტი შეადგენინეს, ამ სფეროში აქამდე რამე გაუკეთებიათ თუ არა?

ზოგადად, პირადად მე, ის ეჭვიც მაქვს, რომ თბილისის გენგეგმაზე გარკვეულ კორუფციული გარიგება შედგა, ანუ „სითი ინსტიტუტი-საქართველო“, რომელმაც ეს გენგეგმა შეადგინა, მას შემდეგ შეიქმნა, როცა მერიამ გენგეგმაზე ტენდერი გამოაცხადა. აი, სწორედ ეს დეტალი აჩენს კორუფციული გარიგების ეჭვს,“ - ამბობს ინკოგნიტო რესპონდენტი.

რაც შეეხება ე.წ. ნარმანიას დროს დადებულ ნაღმს, რომლის თანამონაწილ, როგორც ხელისუფლების წევრი, კალაძეცაა, როგორც საქმეში ჩახედულები ამბობენ, ეს ნაღმი სწორედ თბილისის მიწათსარგებლობის გენგეგმის პროექტია, რომლის დამტკიცბის შემთხვევაშიც, როგორც პროფესიონალები ამბობენ, დედაქალაქი სამშენებლო მასალების სასაფლაოდ იქცევა.

„ეს გადაჭარბებული შეფასება არ გახლავთ. მართალია, გენგეგმის პროექტის ავტორები ცდილობენ, საზოგადოება „დააბოლონ“, რომ ამ გენგეგმის დამტკიცების შემდეგ თბილისს უწინდელი მწვანე პეწი დაუბრუნდება, მაგრამ ეს წმინდა წყლის ბლეფია. გარდა იმისა, რომ ეს გენგეგმა ქალაქისთვის არის ცუდი, ბიზნესსაც მოკლავს. სამაგიროდ, ცალკეული ადამიანების სამშენებლო ბიზნესი გაიფურჩქნება, აყვავდება და რატომღაც მგონია, რომ ამ გენგეგმის პროექტის მიზანიც ზუსტად ეს არის,“ - ვარაუდობს ინკოგნიტო რესპონდენტი.