თუ ქვეყანაში ვითარება ასე გაგრძელდა დასახელებულ ვადამდე, წლის ბოლომდე დიდ ალბათობით ჩვენი პრემიერი ისედაც ვერ მიაღწევს. სახელმწიფოში ქაოსია, ვერ მართავს ვერც ქვეყანას და ვერც თავის გარემოცვას, რომელიც სრულიად უსახური, უსუსური და უუნაროა. ეს თუნდაც უმაღლესი განათლების შესახებ კანონის და იუსტიციის უმაღლესი საბჭოს არჩევნების ბოლოდროინდელმა ისტორიებმა ნათლად და ცხადად აჩვენა. უკვე ბევრი გააფუჭა შინ და გარეთ და კიდევ უფრო მეტს გააფუჭებს. ხალხს ვერც ასაქმებს და ვერც აპურებს. მისი პრორუსულობა მთლიანად გაიშიფრა და გაშიშვლდა. ამერიკელებმა დიდი წითელი შუქი აუნთეს, არც ევროპა სწყალობს მაინცადამაინც და არც უცხოური პრესა. ვერც პუტინი შველის ძველებურად და რეიტინგიც საგრძნობლად იკლებს. ვერც თვითონ ქაჩავს, ვერც უსუფაშვილი და ვერც ახლადგამომცხვარი ფავორიტი-პრეზიდენტობის კანდიდატი მარგველაშვილი. სანამ იქნება ღარიბაშვილის კისერზე. ამ უკანასკნელის სასეირო სერიალებიც ხომ მალე მოსაბეზრებელი გახდება. ოპოზიციის საჩვენებელი დაჭერა-გასამართლებებიც როდემდე უნდა გაგრძელდეს. არც ამათ აქვთ ადრინდელი ეფექტი.

სხვადასხვა მოსაზრება გამოითქვა ამ განცხადებაზე, მაგრამ ყველაზე სახიფათო ვერსია ჯერ ვერ ვნახე. ეს ამბავი ერთხელ უკვე იყო და არ უნდა განმეორედეს.
გვახსოვს ალბათ, 1993 წელს როგორ მოაწყო შევარდნაძემ გადადგომა–გადმოდგომის სპექტაკლი თბილისში, რუსთაველზე მის მიერვე მობილიზებული ადამიანების დაჩოქების თანხლებით. მაშინ მან ხალხს უთხრა: ,,გადავდექი და ჩემს გადაფურთხებულს არ ავლოკავო". ,,ჩვენ ავლოკავთ, ჩვენ ავლოკავთ",–იყო ბრბოს პასუხი.

რა მოჰყვა ამას კარგად გვახსოვს, შევარდნაძის მორყეული ძალაუფლების უსაზღვროდ გამტკიცება, სოხუმისა და მთელი აფხაზეთის ჩაბარება, ქართველების გენოციდი და მრავალი წლის ბნელი და უკუნი.

ახალი ხვეწნა მუდარითა და დაჩოქებით ამჯერად წარმოუდგენლად უფრო დიდი მასშტაბის კატასტროფაა მოსალოდნელი-მთელი საქართველოს რუსეთისათვის ჩაბარება, სახელმწიფოებრიობის სრული ნგრევა, დამოუკიდებლობის დაკარგვა და უკვე საბოლოო ბნელი და უკუნი.

პირველი სასიგნალო ნოტები უკვე ააჟღერეს ცნობილმა კაპიტულანტმა მამუკა არეშიძემ და ყველა დროის ყველაზე მედროვე პოლიტოლოგმა რამაზ საყვარელიძემ. მოსალოდნელია, რომ სხვებიც აჰყვნენ და მალე ვიხილოთ ახალი დაჩოქება უკვე ივანიშვილის წინაშე, ისევ ,,ჩვენ ავლოკავთ" ძახილით.
ეს მოვლენების განვითარების ყველაზე საშიში სცენარია. ღმერთმა ნუ ქნას.