საპროტესტო აქციები პოლონეთში და კაჩინსკი-დუდას დაპირისპირება- პრეზიდენტმა კანონს ვეტო დაადო

მსოფლიო - 18:06, 24 Jul, 2017

1883

სასამართლოს რეფორმის შესახებ პოლონეთის პარლამენტის მიერ მიღებულ კანონს ქვეყნის პრეზიდენტმა ვეტო დაადო. აღნიშნული კანონპროექტი პოლონეთში ფართომასშტაბიანი პროტესტის საფუძველი გახდა. მმართველი „კანონის და სამართლის პარტიის“ მიერ მომზადებულ ორივე კანონპროექტს მოსახლეობის ნაწილი სასამართლო სისტემის დამოუკიდებლობისთვის სახიფათოდ მიიჩნევს. კანონპროექტი, რომელიც უზენაესი სასამართლოს ფუნქციონირებას შეეხება, მას მთლიანად მმართველი პარტიის პოლიტიკური გავლენის ქვეშ აქცევს. მისი პირდაპირი კონტროლის საშუალება ექნება იუსტიციის მინისტრს. საპროტესტო აქციებს შეუერთდა პოლონეთის ყოფილი პრეზიდენტი და მოძრაობა "სოლიდარობის" ერთ-ერთი დამფუძნებელი ლეხ ვალენსა.

ვეტოს გადაწყვეტილება ანჟეი დუდამ ქვეყანაში მასშტაბური საპროტესტო აქციების ფონზე მიიღო. პრეზიდენტის თქმით, საკითხთან დაკავშირებით კონსულტაციები იურისტებთან გაიარა და კანონპროექტს განსახილველად სეიმში დააბრუნებს:

"გადავწყვიტე, რომ მიღებული კანონპროექტები - უზენაესი სასამართლოს რეფორმისა და იუსტიციის ეროვნული საბჭოს შესახებ - პარლამენტში დავაბრუნო, რაც ნიშნავს, რომ ამ კანონების ამოქმედების წინააღმდეგ ვეტოს გამოვიყენებ."- განაცხადა პრეზიდენტმა ანჯეი დუდამ.

პრეზიდენტმა ვეტოს დაადებს უზენაესი სასამართლოს რეფორმისა და იუსტიციის ეროვნული საბჭოს შესახებ კანონებს, თუმცა აპირებს ხელი მოაწეროს მესამე კანონს, რომელიც პირველი ინსტანციის სასამართლოების რეორგანიზაციას გულისხმობს.

პრეზიდენტის მზრიდან მმართველი გუნდის „კანონის და სამართლის პარტიის“ მიერ მიღებულ კანონპროექტზე ვეტოს დადება იაროსლავ კაჩინსკისთან ღია დაპირისპირებას წარმოადგენს, რადგან მმართველი პარტიის ლიდერი სწორედ ისაა და მიუხედავად იმისა რომ ხელისუფლებაში ოფიციალური თანამდებობა არ უკავია, ქვეყანაში დიდი გავლენით სარგებლობს.

აღნიშნული კანონპროექტის გამო ევროკავშირში პოლონეთის წინააღმდეგ შესაძლო სანქციების გამოყენებაზე ალაპარაკდნენ. ევროპული საბჭოს პრეზიდენტი დონალდ ტუსკი, რომელიც პოლონეთის პრემიერ-მინისტრი იყო, პოლონეთში განვითარებულ მოვლენებს გამოეხმაურა და განაცხადა, რომ “კანონის და სამართლის პარტიას” უკან მიჰყავს ქვეყანა.