"სრული პანიკა იყო... თავის გადასარჩენად ხალხი ფანჯრებიდან ხტებოდა" - თვითმხილველები მიწისძვრის მომენტს იხსენებენ

მსოფლიო - 13:11, 21 Jul, 2017

5275

ეგეოსის ზღვაში მომხდარმა 6.7 მაგნიტუდის სიმძლავრის მიწისძვრასმ საბერძნეთის კუნძული კოსი და თურქეთის ქალაქი ბოდრუმი დააზიანა.

კოსზე სტიქიას 2 ადამიანი ემსხვერპლა და 100-ზე მეტი დაშავდა. 100-ზე მეტი ადამიანი დაშავდა თურქეთშიც.

დაშავებულებმა დაზიანებები ძირითადად მაშინ მიიღეს, როდესაც ისინი სახლებს ტოვებდნენ, რამდენიმე მათგანი პანიკაში ჩავარდა და სახლიდან თავის დაღწევა გადმოხტომით სცადა.

20 წლის ლორენ დაფი, რომელიც კოსზე დედასთან და დასთან ერთად ისვენებდა , იხსენებს, რომ ისინი ძლიერმა რყევამ და მსხვრევის ხმამ გააღვიძა.

„ჩვენ სასტუმროში გვეძინა, როდესაც ძლიერი მსხვრევის ხმამ გაგვაღვიძა. როდესაც თვალი გავახილე, მთელი ოთახი მოძრაობდა, ფანჯრები ჩამსხვრეული იყო და ხალხის ყვირილი ისმოდა, რომლებიც იძახდნენ, რომ ყველანი ოთახებიდან გავსულიყავით“ - ამბობს ლორენი.

22 წლის ნაომი რადოკი, რომელიც კოსზე დედასთან ერთად ისვენებდა, იხსენებს, რომ ისეთი შეგრძნება ჰქონდა, თითქოს ნავში იმყოფებოდა.

„ხალხი ყვიროდა, ტიროდა, პანიკაში იყო. ყველაფერი ისე მოძრაობდა, კარადები, ჭურჭელი...“ - ამბობს ნაომი.

თითქმის იგივე მდგომარეობა იყო თურქეთშიც.

„გვეძინა, როდესაც კარებზე ბრახუნმა გაგვაღვიძა, შემდეგ კი მთელმა შენობამ მოძრაობა დაიწყო. თავიდან მეგონა, თავს დაგვეხნენ. როგორც კი მივხვდით, მიწისძვრა იყო, მაშინვე კიბეებზე დავეშვით. ხალხი ისეთ პანიკაში იყო, რომ პირდაპირ ფანჯრებიდან ხტებოდა“ - იხსენებს 21 წლის სოფი ვაილდი.

შეგახსენებთ, მიწისძვრა 21 ივლისს, გამთენიისას მოხდა. მიწისძვრის სიმძლავრე 6,7 მაგნიტუდა იყო სიღრმე კი 10 კმ.