,,ნიუპოსტი" განცხადების ტექსტს უცვლელად გთავაზობთ:

,,პრესის საერთაშორისო ინსტიტუტის საქართველოს კომიტეტი,IPI-Georgia, გმობს საქართველოს შინაგან საქმეთა მინისტრის საქციელს მისდამი კრიტიკულად განწყობილი ჟურნალისტების მიმართ.

ირაკლი ღარიბაშვილმა წამების კადრების ჩვენების წინ დავით პაიჭაძეს სრულიად ლეგიტიმურ და პროფესიულად სწორად დასმულ შეკითხვაზე, გააკეთა თუ არა სამინისტრომ ყველაფერი მსხვერპლთა ამოცნობის გამოსარიცხად, პასუხი არ გასცა. უფრო მეტიც, მინისტრმა ბოროტად ისარგებლა თანამდებობით და იმით, რომ დარბაზში ხელისუფლების მომხრეები, მათ შორის ჟურნალისტები, აშკარა უმრავლესობაში იყვნენ და დავით პაიჭაძეს გასული 9 წლის მანძილზე ჟურნალისტობა უხეშად დაუწუნა. რასაც მოყვა კიდეც მინისტრის მომხრეთა კმაყოფილი ოვაციები.

პრესის საერთაშორისო ინსიტიტუტის საქართველოს კომიტეტი მიიჩნევს, რომ ეს არის ხელისუფლების წარმომადგენლის მხრიდან ჟურნალისტზე მორალური ძალადობა. მინისტრს არ აქვს უფლება ჟურნალისტს მიუთითოს, თუ როგორ უნდა იმუშაოს, არამედ, ვალდებულია პაუსხი გასცეს შეკითხვებს და თმენით მოეკიდოს კრიტიკას.

ის რაც შსს-ში მოხდა, აშკარად ხელისუფლებისადმი კრიტიკულად განწყობილი ჟურნალისტების წინააღმდეგ მიმართული წინასწარგანზრახული პროვოკაციაა, რის შედეგადაც ზოგიერთმა მათგანმა შეხვედრა დატოვა.

პრესის საერთაშორისო ინსტიტუტის საქართველოს კომიტეტი, IPI-Georgia, იმედოვნებს, რომ მინისტრის შეუწყნარებლობა ჟურნალისტური კრიტიკისადმი არ ნიშნავს იმას, რომ გამოძიება ადამიანთა წამების სასტიკ შემთხვევებზე სათანადოდ არ წარიმართება".