რუსეთის ფედერაციის სუბიექტის, დაღესტნის რესპუბლიკის გზების მშენებლობის სააგენტო საკუთარ ფეისბუკგვერდზე ვიდეოს აქვეყნებს, სადაც ასახულია ის სამუშაოები რომელიც "გუნიბის შოსე — ვანტლიაშევსკის უღელტეხილი" გზის გასაყვანად სრულდება. ეს გზა დაღესტნის რამდენიმე რეგიონს კვეთს. როგორც Facebook-ის მომხმარებლები მიიჩნევენ, მშენებლობა ავარო-კახეთის გზის პროექტის ფარგლებში ხორციელდება.

ავარო-კახეთის გზის მშენებლობას საფრთხის შემცველად მიიჩნევენ საქართველოში და აცხადებენ, რომ ავარო-კახეთის გზა საქართველოში რუსული სამხედრო ტექნიკის შემოდინების არხი შეიძლება გახდეს. ჯერ კიდევ 2014 წელს მაშინ როდესაც რუსეთმა ეს განზრახვა გაამჟღავნა და დაღესტნის ტერიტორიაზე ამ გზის მშენებლობა დაიწყო, საქართველოში აცხადებდნენ, რომ ავარო-კახეთის გზა ახალი „როკის გვირაბი“ იქნებოდა საქართველოსთვის. საუბრობდნენ იმაზეც, რომ ამ პროექტით რუსეთს გაუდვილდებოდა არა მარტო აზერბაიჯანისა და საქარტველოს სამხედრო ოკუპაცია, არამედ ეს გამოყენებული იქნებოდა ტერორიზმთან დაკავშირებული პირების შემოსაყვანად, შემდგომ კი ამ საბაბით რუსეთის მხრიდან სამხედრო შეტევის განსახორციელებლად.

2014 წელს როდესაც გიორგი კვირიკაშვილი ეკონომიკის მინისტრი იყო აცხადებდა, რომ ავარო-კახეთის გზის მსენებლობა საქართველოს დღის წესრიგში არ იდგა, კვირიკაშვილი აცხადებდა, რომ მიუხედავად ეკონომიკური ფაქტორისა გასათვალისწინებელი იყო უსაფრთხოების ფაქტორებიც:

„როდესაც ქვეყანასთან არ გაქვს მარტივი ურთიერთობები, უსაფრთხოების ასპექტები მოდის წინ და ეს ასპექტებია გასათვალისწინებელი . მეორე საკითხია, რომ რა თქმა უნდა არის ეკონომიკური ფაქტორი და ყველა გზა ეკონომიკურად ქვეყნისთვის კარგია, მესამე ის რომ ეს საკითხი დღის წესრიგში არ დგას.“- აცხადებდა კვირიკაშვილი.