პუტინს ჰილარი კლინტონის გამარჯვება უფრო გაუხარდებოდა

პუტინს ჰილარი კლინტონის გამარჯვება უფრო გაუხარდებოდა - დონალდ ტრამპი

მსოფლიო - 11:26, 13 Jul, 2017

2198

აშშ-ის პრეზიდენტის დონალდ ტრამპის განცხადებით, რუსეთს თეთრ სახლში ჰილარი კლინტონის ნახვა უფრო აწყობდა, ვიდრე მისი, რადგან რესპუბლიკელების მიერ სამხედრო ბიუჯეტის გაზრდა და ენერგორესურსების ექსპორტი, არ შედის რუსეთის ინტერესებში.

ამის შესახებ ტრამპმა CBN-თან ინტერვიუში ისაუბრა.

„ჰილარის რომ გაემარჯვა, ჩვენი არმიისგან არაფერი დარჩებოდა. ელექტროენერგია კი იქნებოდა უფრო ძვირი. აი , რა არ მოსწონს პუტინს ჩემში. პრეზიდენტობის პირველივე დღიდან მე ძლიერი შეიარაღებული ძალებისთვის ვიბრძვი. ამიტომ ვსვამ კითხვას“ რაში აწყობდა პუტინს ჩემი გამარჯვება“ - განაცხადა ტრამპმა.

დონალდ ტრამპი და ვლადიმირ პუტინი ერთმანეთს G20-ის სამიტის ფარგლებში შეხვდნენ. ეს მათი პირველი ოფიციალური შეხვედრა იყო.

ტრამპის თქმით, მათ განსხვავებული მიზნები გააჩნიათ, რადგან პუტინი რუსეთის ინტერესებისთვის, ტრამპი კი აშშ-ის ინტერესებისთვის მუშაობს.

„მას რუსეთისთვის სურს კარგი, მე კი შეერთებული შტატებისთვის. თუმცა, შეგვიძლია შევთანხმდეთ, მაგალითად სირიის საკითხზე, ცეცხლის შეწყვეტასა და სხვა შემთხვევებზე“ - განაცხადა ტრამპმა.

ამჟამად, FBI და აშშ-ის კონგრესი აშშ-ის საპრეზიდენტო არჩევნებში რუსეთის შესაძლო ჩარევის საკითხს სწავლობს.

საპრეზიდენტო არჩევნებში დონალდ ტრამპის გამარჯვებისთანავე, გაჩნდა ბრალდებები, რომ სავარაუდოდ, მისი საარჩევნო შტაბი რუსეთთან თანამშრომლობდა.

დონალდ ტრამპმა აღნიშნული ფაქტი არაერთხელ უარყოფს. აშშ-ის არჩევნებში ჩარევის ფაქტს კატეგორიულად უარყოფს ოფიციალური მოსკოვიც.